ꌩꃀꀉꄂꁧ

ꁱꊿ：ꐚꅪꉙꌒ

ꀘꌠ：ꐚꑕꒈꎆ

ꈍꄮꅑꅸꇁꌠꉬꀋꐚ

ꎺꏣꈐꌩꃀꀉꄂꑠꁧ

ꉡꐊꐥꐨꈝꃀꇬꍬꅗ

ꉠꅿꎺꏣꐣꁙꇬꀀꅗ

ꊁꑞꑍꑞꉖꇬꉬꀋꐚ

ꉢꌩꃀꋋꁧꑭꐨꊂꇬ

ꈹꀋꂪꃅꇿꊰꇈꀋꐚ

ꄂꀕꋍꎺꏣꋍꈆꀉꄂ

ꋌꐒꋌꄻꉢꁳꇊꅊꇈ

 ——ꇬꅇ

ꀊꄶꉪꏤꑳꉎꇬ

ꌩꃀꀉꄂꁧꇫꋦ

ꆀꆳꇀꑌꄚꇬꎟ

ꎰꆳꇀꑌꄚꇬꏙ

ꉌꊭꐔꇁꌨꀑꉖ

ꁯꄸꑗꇁꌩꏾꋠ

ꁯꍛꐚꇁꁱꇷꅤ

ꎇꃀꀥꇁꌩꄿꃝ

ꃬꊭꐺꇁꌩꐴꇵ

ꄚꑠꃅꑴꇬ

ꌩꃀꋥꅉꋥꑴꌦ

ꌩꃨꍺꄮꍻꑴꌦ

ꌩꏾꅑꄮꅑꑴꌦ

ꌩꂷꎑꄮꎑꑴꌦ

ꌩꃀꀉꄂꑠꁧꑌ

ꋋꑌ

ꀊꆨꋍꃢꂓꋦꋺ

ꋍꃢꄂꋦꑴꑳꇨ

ꆳꇨꉏꇨꋌꄡꋻ

ꃅꇨꉮꌸꋌꈴꋺ

ꆲꏂꃄꐡꋌꊝꋺ

ꏂꆨꐻꎵꋌꒃꋺ

ꃮꆪꑬꊸꋌꃪꋻ

ꃅꊭꄝꌠꋌꈨꋺ

ꃅꆗꁨꌠꋌꂿꋺ

ꆫꃀꄚꑌꌐꒉꏿ

ꆫꌺꄚꄉꋛꋚꄂ

ꀉꁌꄚꑌꁦꌺꆫ

ꀊꂵꄚꄉꑱꉌꍹ

ꀉꄉꄚꑌꁮꅉꌧ

ꀉꂿꄚꄉꑘꀕꇖ

ꀊꉘꄚꄉꈩꌒꇖ

ꊁꈍꑋꈎꐛꇬꆏ

ꌩꃀꀉꄂꋋꁧꑌ

ꈎꄜꃀꅉꇀꅉꑟ

ꌩꈤꅿꁮꅿꀋꇁ

ꌩꏀꊛꅉꊛꀋꇁ

ꀉꇙꃪꃹꉆꌠꌡ

ꄁꆹꐞꃅꐋꀋꊌ

ꋍꌬꍩꄚꄉꌐꂫ

ꋍꂿꄐꄚꄉꅐꌐ

ꋍꊂꈭꐨꆏ

ꃰꊿꋍꂾꃤꃀꉈ

ꃰꊿꋍꂾꅅꃅꒃ

ꃰꊿꋍꂾꀵꏣꄻ

ꃰꊿꋍꂾꅇꇨꅐ

ꌩꃀꑓꁴꒈꇬꇉ

ꌩꃀꉌꃀꊭꈜꁮ

ꌩꃀꇇꇊꏯꄹꊰ

ꌩꃀꇭꀧꏃꎎꐛ

ꌩꃀꐚꇁꃄꅉꅞ

ꂾꃚꈢꈐꇬꉼꈴ

ꂾꃚꈢꉈꇬꀠꈴ

ꌨꀑꏓꌩꇵꈆꐛ

ꌩꐧꋲꌩꁐꈉꐛ

ꌩꐴꈘꇁꊖꀀꇊ

ꄂꀕꋍꄮꇬ

ꌩꁐꌩꈉꏢꁮꇬ

ꉌꊭꑋꅉꑌꑴꌦ

ꁯꄸꑖꅉꑗꑴꌦ

ꁯꍛꀀꅉꀀꑴꌦ

ꎇꃀꋍꂾꉆꑴꌦ

ꃬꊭꋍꂾꐺꑴꌦ

ꄂꀕꃰꊿꑠꀉꄂ

ꋍꂾꀋꂿꀋꈨꎴ

ꊁꄮꈉꊭꐛꇬꆏ

ꌩꃀꃆꂮꈁꐤꌠ

ꁡꇤꊿꀋꉉꆘꅝ

ꌩꃀꀉꄂꋋꁧꑌ

ꇁꄚꁡꇤꋦꋺꄷ

ꊿꇫꅉꀋꐚꌠꌡ

ꌩꐴꈘꊖꀀꇊꌠ

ꄡꇗꁮꋚꐛꆘꅝ

配乐：吉潘木乃

配图：吉尔羊力