《ꂙꃨꄂꃅꃨ》

ꁱꊿ：ꇔꇷꀉꃈ

ꀘꊿ：ꐚꑕꒈꎆ

ꃮꆪꈨꑭꏁꌬꀕꌠꇂꃴ，ꁦꀑꂙꃨꁧꇂꇉꈽꅪꇁꌦ。ꂙꃨꎔꌠꁧꐙꋽꒌꄀ，ꑱꌆꑱꉼ、ꅾꉘꌒꌠꁧꇂꇉꄩꏣ,ꇉꅶꈯꊂꂋꐺꄮ，ꆀꃅꁡꇤꀕꈐꑭꊂꈍꈩꉐꍣ、ꑵꇁꉙꃚ、ꃆꃀꉐꂷꎓꁨꀕꌠꇬꈌꐚꀕꑴꌦꂯ?ꇉꄩꇪꀮꂶꌠꋍꅇꋌꄜꇁꄮꑟꀐꑴꇬ,ꌕꆪꀊꄁꂿꄎꌠꋌꇬꀋꎺꃅꄉꀥꌊꉷꃅꇓꈓꌞꑘꏲꐺꄮ,ꁡꇤꋌꊏꈥꇤꀕꅀꑞꃅꑌꀋꐛ?ꇆꅶꇬꒈꏾꌺꈧꌠꀊꄁꂋꌊꒉꈯꋦꌠꇓꉘꇓꆈꄩꈴꐺ,ꇪꀮꂿꃚꋒꄉꃚꎔꇱꂿꉂꑴꇬ,ꇪꀮꈍꄮꇁꌠꊨꀋꄅꀋꉆꃲ，ꆏꄑꉠꇢꏿꄉꄮꐰꋋꂷꀈꈥꇤꀕꁧꑌꉆ。ꁬꃨꆰꃨꂓꊿꇬꀋꌧꑠꈨꀊꄁꑞꑌꋌꇬꀋꁣꃅꇨꊸꅑꌊꈁꑓꅩꍠꅍ，ꊿꑊꅪꅑ、ꇨꃃꅑꂷꌡꄉ，ꈭꇍꋦꇐꈧꌠꉬꇮꏆꇬꁳꄉꌐ，ꋍꇬꅓꈿꀋꀬ。ꑞꑌꀋꐈꌠꌡꑴꇬ，ꑞꑌꈎꆪꄮꈉꐊꄉꇬꊎꐛꐈꁮꑋꒉꇰꂯ......

ꀄꊭꃅꄮꇬꏃꅋꈚꄉꏬꆉꃰꌠꋒꃅꐺꌠꆫꌺꈧꌠꇿꇬꁧꌐꑌꀋꐚ?ꂙꃨꌟꃅꑊꏦꅑꌊꈁꑓꅩꍠꀕꋺꌠꀊꌱꑘꀕꂶꌠ,ꂙꃨꅩꇉꀕꑠꀮꑣꌊꀑꆗꃅꇢꋵꑟꄮ,ꉪꄉꇈꌠꉂꇁꑟꅇꃅꆳꂷꉐꌌꁧꌐꌠꌡꄉꈌꁉꅇꀋꇁꌠꐛꒌꁧꐙꋌꎺꑴꇬ,ꊿꈧꌠꆹꆀꃅꇕꈌꇿꇬꃹꁧꌐꑌꀋꐛ?ꋃꆧꀊꐎꆏꈹꉢꄎꃅꈧꌠ、ꉸꉹꃬꋒꆏꂢꉠꇰꃅꋺꌠ、ꑸꑽꈾꃚꆏꀵꉠꍈꃅꋺꌠ，ꒉꐑꐝꍠꀕꌠꆏꃬꉠꋌꃅꋺꌠ，ꃅꃴꀀꀨꃅ,ꃄꅉꈇꆦꃅꄉꀄꂼꂻꋺꌠ,ꃨꎔꈬꇬꏬꏮꍃꄉꁠꈪꁠꑓꇬꄉꀋꋓꀋꉪꇇꐛꐯꄀꉌꃀꄐꄹꐂꋺꌠ、ꑓꑟꐮꊝꈁꑓꅩꍠꀕꋺꌠ、ꆗꄮꋍꑍꃀꇁꎼꀋꇿ,ꎹꄓꈧꌺꈊꇁꎼꀋꇿꌠꀕꏀꈧꌠꆹꇿꇬꁧꌐꂯ?ꀃꑍꋋꄮꂙꃨꑠꀮꆍꊇꉌꃀꈐꏭꀀꀕꌦ,ꎺꇁꄮꇬꉌꃀꊷꆣꆹꆣꀕ,ꉌꃀꈥꇤꆹꇤꀕ?ꑓꁴꑰꀕꆹꇤꀕ?ꏂꁏꀒꊥꑌꄉꉂꇁꅉꂷꆹꎺꀕ?

ꊿꐙꊾꄮꇁꂷꐥ,ꃅꐛꊀꄮꇁꂷꐥ；ꐰꇑꐮꇴꇁꌠꐥ,ꉌꃀꐮꄮꇁꌠꐥ。ꌠꈄꆗꌺꐤꅉꃅꈋꇐꑌꌠ；ꏨꆉꃺꆙꈁꐥꅉꇬꃅꑆꃴꇉꀕ；ꀉꐔꅪꎔꈁꐥꅉꇬꂙꃨꀕꈍꀕ。ꂙꃨꋦꅉꐛꑿꄚꇬꌵ；ꏜꉘꐤꅉꑌꑿꄚꇬꐥ；ꏪꈜꐛꅉꃆꇭꄚꏮꏑ；ꀉꐔꐤꅉꆗꌺꄚꇬꏓ；ꄇꉼꋴꅪꈚꌠꁦꀑꁧꄩꏹꆹꄮ,ꌠꆗꈍꑌꉱꏂꎵꃀꀵꌊꄚꊂꈹꆹꇰ,ꂙꃨꀕꄮꀑꆗꀊꌱꄚꇬꋓꐂꏽꋺꌠ，ꋓꑵꏿꋺꌠ，ꆀꃅꁮꅉꋀꊇꌌꄉꁧꇂꇉꄩꇱꄉꃨꋺꌠ。ꐂꄮꆗꁍꀕꃅꐂ，ꐂꇊꐮꅿꂤꈐꃹꄉꏽ；ꑵꄮꇖꈭꀕꃅꑵ，ꑵꌊꐮꅿꉌꃀꄸꈐꃹꑟꉂ。ꊿꐥꐛꅹꁧꐙꋬꂻꇗꄃꀕ，ꒈꇁꉐꃚꇗꈭꀕ;ꑌꐥꐛꅹꁧꐙꇐꑌꊫꉘꀕ，ꀊꋨꄮꇬꁧꐙꆹꌦꑌꌗꑌꉘꇉꐨꐥꌠ；ꁧꑌꊿꉂ，ꊿꑌꁧꉂ,ꃅꆹꊿꐓ,ꊿꑌꃄꍅ,ꒈꒉꉜꏂꌟꃅꎵꑳꀕꃅꐮꐊꅷꇁꌠ。ꄚꊂꇁꑠꑍꁧꐙꈤꇤꀕ，ꂙꃨꀞꄂꀕꃅꃨꁧꑵꉬꎼꀋꇿ，ꇪꀮꂾꃚꑠꈨꉷꃅꇓꈓꍯꁧꑵꉬꎼꀋꇿ,ꂙꃨꒌꆠꑠꈨꎼꇁꃏꐊꉷꃅꇓꈓꃨꁧꑵꉬꎼꀋꇿ!

ꁌꇁꀖꐥꅐꇐꊰꑋꑟꌠꈍꑋꁧꐙꇤꆏꁳꄉ,ꆏꋌꉘꋌꉚꀉꒉꌠꆏꇬꌋꀕꀋꐛ?ꑆꊋꀉꇖꇨꌠꆏꇬꀱꀋꄐꀐꌠꆏꐚꀕ?ꌞꌺꁧꄩꉆꄉꑘꀕꉙꌠꀋꐥꃲ；ꌞꃀꁧꑭꑌꄉꉸꉹꂢꌠꀋꊌꃲ；ꀉꂿꃀꇭꇇꌋꉘꁮꁠꋺꈧꌠꈨꐊꈢꅸꃹꁧꃲ!ꀋꁧꀊꇫꑳꅝꉒꐎꄓꈧꌠꉒꇁꉐꐊꑍꁧꃲ!ꅔꊂꇌꂿꃚꀋꈨ，ꇉꅶꃅꊨꃚꀋꈨ；ꒉꇸꉛꁠꇁ，ꌩꏓꎺꁠꇁꌠꆹꀊꎳꀐꌠꁮꅉꐛꇦꎭ。ꀃꑍꆹꆏꁧꑭꉆꄉꊼꇅꏮꁧꄩꉜꋺꏭꑌꀋꐛ。ꀉꇨꄷꇬꑌ，ꉠꀀꅉꀉꆹꁧꐙꑞꂷꇬꉬ,ꉢꀊꄶꃮꆫꑿꆫꋺꄷꑠꇬꌧꌞꊾꇰꄎꌠ。ꁧꄩꊨꊭ、ꃨꎔ、ꋠꇁꅝꇐ、ꋃꆧꀊꐎ、ꒉꇸꒉꇉ、ꎼꇁꈴꅉꂸꇷꂸꇱꌙꈈꀕꃅꀊꄶꊰꇈꃳ!ꀊꆨꀊꉘꒈꇁꉐꃚꎓꁨꀕꋺꑠꈚꉬꌠꇿꄷꋋꑇꂯ?ꀊꆨꃮꇁꃬꍅꑌꇁꑾꐥꐍꏪꀕꈚꉬꌠꇿꄷꋋꅇꑇ,ꈜꀕꇉꉂꏣꉂꑟꑠꈨꑌꏃꆪꄔꊒꂷꇭꌟꃅꄚꇬꐞꋺꌠꑌꊿꇬꅇꑇꈨꀋꉬꀐꌠ。

ꂙꃨꒌꆠꉷꃅꍯꁧꄮ,ꁧꄩꒌꁧꆠꐞꌠꂙꃨꀞꄂꀕꃅꃨ,ꌙꈈꀕꃅꊰ,ꈀꄸꉜꄉꃨ?ꈀꄸꉜꄉꊰ?ꁧꐙꀊꄂꇬꅉꐚꄡꑟ。ꇪꀮꉷꃅꍯꌠꊿꋋꌅꀋꄎ，ꃨꒌꉷꃅꆙꌠꃅꅍꎷꀋꊌ,ꀉꐔꈩꌒꇕꇬꎷ,ꃰꊿꐥꌒꇕꇬꎷ,ꎇꃀꏜꐥꇕꇬꎷ,ꂙꃨꀞꄂꀕꃅꃨꇬꎷꈜꁮ......

图片设计：吉潘木乃

背景音乐制作：吉潘木乃