ꒉꉗꉙꏂꀊꋨꎆ

ꁱ/ꈚꆧ

ꀘ/ꐙꇐꑸꆀ

ꌶꅉꈐꏭꃹꇁꑲꆏ，ꒉꉗꉙꏂꀊꋨꎆꇁꌊꊽꑓꐛ。ꎆꃅꎆꇌꀕ，ꃴꃅꃴꍚꀕ，ꇦꃅꇦꉾꀕ。ꈎꇁꃅꈭꏝ，ꑍꇁꌋꀋꐥ，ꋀꊇꆹꅡꊪꅍ，ꄉꉬꃅꄚꇬꋦꇬꎷ。ꃅꆳꂷꉐꄡꑌꀋꏦ，ꃰꌦꉈꌦꌸꑌꀋꏦ，ꃅꆗꃅꊭꇶꑌꀋꏦ。ꀋꇊꆏꑠꃅꉉꌠꌡ:“ꉢꒊꌋꃅꄚꑌꄉ，ꌶꅉꀧꌋꃅꂿ”。ꋍꃢꋑꀋꋒ，ꒉꉗꉙꏂꋋꎆꇂꃴꈴꆹꑲꆏ，ꉢꄗꇬꉆꄉ，ꀂꏾꐕꌊꋀꊇꋍꇅꆫꃬꇬꎷꑟꃅ。ꃅꋆꄮꐰꆏꌩꇇꇷꀠꀕꈧꌠ，ꋅꆳꉼꀕꂇꌠꐊꄉꆼꁏꆼꆣꈩꌠꆫ；ꃅꑌꄮꐰꆏꍡꌺꅿꁮꇙ，ꀑꇬꉀꒆꏿꌠꉜ；ꃅꎸꄮꐰꆏꌩꏾꃴꍚꃴꆧꁏ，ꍅꃅꈨꃅꄓꌠꉜ；ꃅꍵꄮꐰꆏꌩꏾꆳꅸꊰ，ꁯꆮꅏꐡꃰꃅꃰꌠꆫ……

ꋍꈓꋍꃢ,ꃅꎸꃘꆪꄮꐰ,ꑟꇁꌦꀐ。ꌶꅉꇬꒉꉗꉙꏂꎅꌠ，ꎼꈎꄉꈜꀕꋽꌠꌡ，ꌩꄿꇇꄌꈾꃚꈧꌠ，ꇶꌎꀕ，ꁋꍫꀕꑴꇬ，“ꇬꇉꎺꁯꑌ”ꐤꁮ。ꑠꀋꉬꑲꆏ，ꌩꇇꈧꌠꈍꃅꍔꌊ，ꈯꒆꄿꎟꅉꄩꑟꇁꄎꂯ？ꌩꏾꈧꌠꈍꃅꃴꍚꃴꆧꁏ，ꈨꑭꇂꃴꄉꆼꁏꆼꆣꈩꄎꂯ？“ꌩꃀꈀꋦꅉ，ꊨꊭꏮꏑꏿ”。“ꀎꋏꌩꁧꊪ，ꊂꋊꌐꒉꏿ”ꇈꌠꉬꀐꍰ,ꀊꆨꈀꋩꊪꄉꇈꌠꉬꂯꇆ?ꒉꉗꉙꏂꋋꎆ。“ꀆꌳꀅꌳꃅꁧ，ꉠꐋꀨꀅꌳꃅꁧ......”ꃅꑵꉙꊱꌠ，ꂘꑳꈐꄉꆳꌌꅺꈨꇁ。ꐧꌷꀁꂥꌕꊐꌶꌺꈧꌠꉌꐡꑓꇗꏿꄉꇬꊎꍡꐺ，ꋀꊇꌶꅐꁧꂯꄮꑟꇁꌦꀐꆺ。

ꉢꄗꄚꉆꄉꋍꃢꅲꇈ，ꉢꎺꎼꈎꃅꋆꄮꐰꄀ，ꏪꐦꇁꄿꑠꇬꃰꌗꉈꌗꇨ，ꃰꌗꉈꌗꇂꃴꒉꉗꉙꏂꀊꋨꄮꇷꀠꀕ，ꁋꍫꀕ。ꀊꃶꀊꌗ，ꄙꇓꊭꇓꆸꐔꁧꄉꏽꌠ,ꌩꇦꈧꌠꊽꎭꃅꉈ。ꀋꇊꆏꊿꈬꊰꏠꁧ，ꉮꃆꎭꃤꀉꇨꑠꊝꋺꂷꌡ。ꄚꑠꃅꑴꇬ，ꋌꀒꑍꑌꅡꊪꀕꃅꄚꇬꋦ，ꊂꑋꑌꅡꊪꀕꃅꄚꇬꋦ，ꑞꊝꇬꑌꈌꊰꇁꀋꉆꌠꆫꃀꀉꁌꂷꌡ。ꄚꑌꄉꆳꇁꉏꇨꄡꇬꎷ，ꋍꑍꈌꊰꇁꀋꋻ。“ꃅꑍꋚꀋꍈ，ꃅꉖꒉꀋꄐ”ꄮꈉꇁꌊꑋꊂꌕꆪꑟꀐ，ꑋꆳꇬꂾꄱꌠꐊꄉ，ꒉꉗꉙꏂꎅꌠꑌꄚꈿꀀꐚꇁꀐꅊꇈ。ꋀꊇꑓꍝꌺꃅꅿꁮꇙ，ꑋꒉꏶꄉꅝ，ꑋꉐꐊꄉꒆ，ꋍꑍꋍꉙꃅꀉꒉꆹꀐ。ꋦꌊꊽꑓꐛꑓꇁꌠꃴꍗꃴꆧꁏ，ꇰꀋꃀꌠꀑꇬꐛ。ꉢꉪꇬ，ꏂꆨꉱꏢꀕꄮꐰ，ꋀꊇꆹ，ꈍꃅꑌꋍꃢꆏ，ꃅꑌꄮꐰꑟꇁꎂꀕꌠꑇꄉ，ꑞꑌꀋꏦ，ꉌꃀꉘꇉꐨꐥꄉ，ꋰꅷꇁꌠꉬꄡꑟ。

ꉠꂴꆽꉓꀍꅩꍅꄓꌠꒉꉗꉙꏂꋋꎆꂾꄮ，ꉢꎺꀋꉊꄹꈎꌶꅐꁧꀐꌠ，ꉠꌶꌺꑍꇯꌠꄀ。ꋀꊇ“ꑍꆏꃬꀮꐊꄉꄓ，ꌊꆏꆧꌺꐊꄉꈻ”，ꂘꑳꈐꏭꑌꄉ“ꌗꇐ”ꁮꑍꃀꈄꃮꃅꃮꈧꌠ，ꌌꀂꏾꈎꄉꀱꇊꀱꎥꃪ；“ꉇꄅꅇꉙꅇꇬ”ꈧꌠ，ꃅꃴꏷꌺꌡꃅꄖ，ꋀꊇꋍꇬꇈꋍꇬꄹꎺ；“ꐈꇐꎊꇗ”ꑵꌠꑠꀊꅰꊿꋌꇤꀑꃀꑓꉱꏂ。ꄚꑠꃅꑴꇬ，ꉠꌶꌺꋋꑍꇯ，ꋍꂷꑌꈌꀋꊰ。ꉢꅉꐚ，ꋀꊇꆹꌳꉔꀉꂿꁳꍔꇁꑋꅉꃅꂿꉂꌠ；ꉌꃀꁦꀑꉪ，ꐰꇑꁧꄩꑟꂿꉂꌠ；ꑓꏮꋧꃅꉜ，ꑭꁘꀊꐯꍰꂿꉂꌠꉬ。ꑠꅹ，ꋀꊇꑍꇁꉖꅉꀕ，ꀱꇊꀱꃅꌷꇬꎷ，ꑞꑌꀋꏦ，ꑞꑌꀋꐒ。ꉢꋀꊇꏯ:“ꌷꐋꊇ，ꀋꄸꄷꐙꄏꑲꆏ，ꑓꏮꃨꋦꁍꒉꉗꉙꏂꎅꌠꊼꇅꉜ，ꋀꊇꌩꑆꇷꌎꀕꑴꇬ，ꇬꇉꎺꁯꑌ；ꌩꇇꀁꆓꀁꉔꑴꇬ，ꑍꈬꏧꇁꌟꃅꈈ；ꌩꏾꀄꊭꀁꃏꑴꇬ，ꀉꑌꋯꑌꐮꊂꈹ。ꆍꊇꈀꋩꑌꊋꇤꄉꀒꌷꑟ”ꄷ。ꉠꌶꌺꑍꇯꌠꑌ，ꏪꀋꁙꃅꊋꇤꄉꊋꐛꌐ。

ꀋꄸꄷ，ꆏꇁꌊꏪꐦꊿꋅꐧꌶꅉꑟꇬꆹ，ꇯꍝꃅ，ꇬꂾꅽꑓꐛꇁꌠꆹꒉꉗꉙꏂꋋꎆꉬ，ꋀꊇꈍꃅꇷꄙ，ꊋꑌ，ꉀꎆꀒ！“ꀋꃅꎼꈎ，ꄚꌶꅐꁧꂯꌠꌶꌺꈧꌠꑌ，ꏪꀋꁙꃅ，ꊋꇤꄉꊋꐛꆹꄡꑟ！”ꉢꉪꅉꆸꅉꃅ，ꇁꌊꂘꑳꇂꃴꑟꀐꅊꇈ。

图片设计：吉潘木乃

背景音乐制作：吉潘木乃