ꏃꆪꄔꊒ

ꁱꊿ：ꇔꇷꀉꃈ

ꀘꊿ：ꐚꑕꒈꎆ

ꄔꊒꌠꆹꆈꌠ、ꀙꋇ、ꇂꑫꋇ、ꏷꆈꋇ、ꆿꈬꋇꃅꀁꑌꊿꋅꁍꇩꑾꌋꈤꏭꀀꋋꈨꅿꀎꋏꍸꇐꋩꑍꀋꉬꀋꉆꑠꂷꉬ。ꄔꊒꋩꑍꈐꏭꊿꋆꁰꁱꌧꇐꑠꏃꁍꆿꇤꒉꃅꄚꇬꐊꄉ，ꊿꌌꋊꊛꀻꎆꅷꇁꌠ，ꆃꎬꆈꌠꃅꈋꆹꆈꌠꃅꑍꃮꆪꒉꈬꑍꆏꄔꊒꑟꃅ。ꄮꈉꋋꊭꆏꀉꑌꄹꁆꌠꆏꄉꉻꃅꈎꏃꆪꐰꉎꊝꇬꎷꄉ，ꈀꄸꑌꏃꆪꄔꊒꄷ。

ꆈꌠꄔꊒꇁꀦ、ꄔꊒꁧꀿꉉꄟꀉꑌꑵꃅꐥ。ꋍꈨꉉꇬꆏ：ꏃꃅꉬꉎꉬꄚꇴꌅꄰꀋꃋꑘꀕꂶꌠꀉꄉꅇꃅꀋꅲꃅ，ꋌꎼꏃꃅꉬꐮꐧꃅꌻꑘꄷꐛꇁꈭꐨ，ꉬꄚꇴꌅꄰꄉꋚꇕꒉꈁꈧꌠꋌꈐꌊꏃꃅꉬꐮꊪꏽꇉ，ꋙꋦꃴꇉꀕ、ꇣꋦꐽꇉꀕꃰꊿꋚꅗꇁꂯꌠꉬꄚꇴꌅꌋꅜꄉ，ꋌꇨꇓꃃꌊꏃꃅꉬꉎꄉꉮꁮꑠꀉꇨꃅꋌꃑꏃꃅꉬꐮꎼꒉ。ꃰꊿꁳꄉꋚꈔꒉꈤꂮꐚꌦꎼꏭꉨ。ꄚ，ꏃꃅꉬꐮꀑꁮꅺꐳꌠꃰꊿꈧꌠꆏꀱꆽꃅꁁꆡꐔꄀꃅꇴꌊꌧ、ꂷꇭꄔꄉꐗꃅꇈ，ꀊꉗꀋꐛꇬꆏ，ꉮꁮꈧꌠꉬꇮꊿꐔꄀꈔꋏꇨꎭꌐꄉ，ꋚꁧꇬꁦꀋꏙꃅꋋꄹꈎꋚꅗꒉꅗꊌ，ꋚꄉꃪꅪꎆꄉ，ꊂꆏꃰꊿꉮꁮꏭꄵꏮꇬꊋꐛꌠꎺꄀꂾꄷꄉ，ꄔꊒꌠꆏꑠꃅꇁꌠꉬꑴꄷ。

ꀉꁆꋍꈨꉉꇬꆏ，ꏃꃅꉬꉎꈒꑌꊋꇨꈯꄿꀉꒉ，ꊋꃤꑠꌌꁦꌺꍠꄎꌠꌦꌺꀉꁘꉬꄷꑠꂷꐥ;ꏃꃅꉬꐮꑌꈒꑌꊋꇨꐧꋦꃰꊿꇬꄿꂷꀋꐥꌠꌻꇭꌺꄿꉾꄛꆠꁠꉬꄷꑠꂷꐥ。ꑠꋍꃢ，ꏃꃅꉬꉎꉬꄚꇴꌅꆏꌦꌺꀉꁘꁳꏃꃅꉬꐮꆳꎳꃱꎳꒉꎼ。ꋌꇁꌊꏃꃅꉬꐮꑟ，ꃰꊿꉬꇮꆳꃰꎫꌊꀃꃀꋚꀋꑌ，ꇭꀧꃢꀋꈚ，ꌢꎭꅉꈨꂿ，ꐥꇨꐤꎭꐥꊋꇨꑴꇬ,ꈀꄸꑌꌦꌺꀉꁘꏦꄉꈂꀸꁱꐭꀋꀬꆳꃰꌞꇬꁳ。ꋌꇁꌊꉾꄛꆠꁠꄰꑟꇬꆏ，ꉾꄛꆠꁠꇬꊎꋚꋠꇰ。ꋋꆹꋚꊿꎃꐚꑵꌠꋠꌠꀋꋠ，ꎸꅍꁠꀕꋍꀊꈪꌌꇬꑌꄉꋠꇰ。ꇇꇤꑱꇤꃐꁃꌠꇬꄉꎸꅍꁠꀕꂷꋍꍞꌦꌺꀉꁘꁵ。“ꍧ，ꄿꏀꋚꋠ”ꄷ。ꌦꌺꀉꁘꋌꅥꇨꄚꀋꇊ。ꋌꉜꇬꊿꋋꂷꇣꋲꂷꉬꉂ。ꋌꆹꎸꅍꑠꈍꃅꋠꂯꉂꂵꇖꀕꑴꇬꂿꃆꀋꌐꀋꉆ。ꌦꌺꀉꁘꄹꇬ：“ꐳꃅꆳꃰꎭꎼꇁ，ꉢꆏꐏꄚꐥꀋꆷ”ꄷ。ꉾꄛꆠꁠꆏ：“ꆏꑌꏃꃅꉬꉎꌦꌺꈬꇬꈒꑌꊋꇨꋍꉎꀋꐥꑠꂷꉬꄷꉢꈨꇁ，ꉢꑌꄡꇗꏃꃅꉬꐮꐧꋦꃰꊿꃅꇬꊼꇅꌀꒃꊋꇱꑠꍈꇮ。ꉣꑊꄚꄉꊼꇅꇱꉚꇈ，ꆏꊋꄷꆏꉢꆳꃯꑠꁦꎆꄀꄉꇯꎭꆏꁳꎼꁧ，ꀋꄸꄷ，ꆏꆹꉠꀋꄿꑲꆏ，ꋌꉈꆏꐧꋦꃅꄷꆳꃰꎳꇁꀋꉆꀐ”ꄷ。ꌦꌺꀉꁘꆹꀋꉬꄷꇬꑌꏃꃅꉬꉎꌦꌺꂷ,ꐧꋦꃰꊿꂷꐮꈌꊰꇬꑊꏦꄉꍑꑴꄷ。ꄚꉌꂵꈐꆹꊼꇅꐬꆠꉻꃅꐙ。ꌦꌺꀉꁘꂴꆽꑣ，ꉾꄛꆠꁠꇙꁱꑌꀋꋏ，ꇓꆈꌟꃅꅡꊪꀕ。ꊂꇁꉾꄛꆠꁠꑣꇬꆏ，ꌦꌺꀉꁘꋌꌌꃬꁍꀕꃅꌔꏮꀕꇈ，ꋌꂖꎼꒉꇬꆏ，ꊋꏃꀉꇨꀕꄉ，ꋌꍞꑳꐮꃪꇭꅩꑳꀕꂷꌠꇬꊐꎼꁧꄉ，ꌦꌺꀉꁘꊰꇁꃪꃹꇓꀮꇓꈄꈬꇬꌸꄉꋌꐷꌦꇨꎭ。ꌦꌺꀉꁘꅾꂿꂷꌠꍹꐛꆰꀿꈭꐨꆏꐈꇁꁮꆰꉮꁮꐛꋚꒉꉮ，ꃅꃴꆈꏪꀕ,ꃄꅉꆈꅊꀕ。ꉹꁌꃰꊿꆏꂷꇭꄔꌌꉮꁮꏭꐗꄉꊋꐛ。ꃅꑍꋋꑍꆏꊝꀕꃅꃮꆪꒉꈬꑍꉬꄉ,ꋋꈨꎺꄀꂿꄷꄔꊒꌠꆏꑠꃅꇁꌠꉬꑴꄷ。ꈍꃅꉉꄿꂿ，ꐩꋊꆹꐩꋊ，ꁮꅉꆹꁮꅉ；ꍸꇊꊂꋒꇈꌠꆹꀋꑍꀋꈤꌠꂷꇭꊏ，ꁬꏀꀻꎆꌠꃰꊿꁥ，ꏂꅪꌡꌠꋩꑍꂷꉬ。

ꆃꎬꆈꌠꄔꊒꌠꆹꌕꑍꊒꑟꃅ。ꇬꂾꄹꉇꆏꄔꋩ(ꄔꆦ)ꄷ。ꋋꄹꉇꆏ,ꆈꌠꉹꁌꈯꇁꈜꃅꇌꉘꇌꎶ、ꃮꀠꑿꅰꌉ，ꃬꀮꃬꎶꐗꄉꁍꇁꀿꒌꆦ，ꄔꌋꐰꇑꆦ。ꊂꄹꉇꌠꆹꄔꈩꄷ。ꀊꉘꌟꒉ、ꄿꏀꑮꆜꉬꇮꃅꄔꊏꂷꇭꄔꄉꋍꏅꈩꅉꄸꉺꇬꄉꐂ，ꋚꏪꒈꏪꁍꑘꈬꊂꇬꄉꐂ，ꈂꀸꆏ：“ꊒꑲꊒꈩꇁ，ꇂꁱꇌꎶꊒꈩꇁ，ꃆꇭꃅꃨꊒꈩꇁ，ꌄꌺꆈꌺꊒꈩꇁ，ꐎꂾꂓꅑꊒꈩꇁ，ꐍꌺꄿꏀꊒꈩꇁꃅ，ꆀꇁꉷꌺꊒꈩꇁ”ꃅꈂꀸꇬꃹꇁꌠ，ꄔꊒꃆꂮꐥꌠꏈꄉꄔꊒꈩꑵꉬ。ꊂꄽꂫꌕꑍꌠꆏꄔꎭꄷ。ꋌꆹꄔꊒꈣꍅꄷꌠꑌꐥ(ꐟꈯꇤꇉꆭꏸꎫꇤꃅꄷꆏꑠꃅꉉ)。ꋋꆹꄔꌋꄔꐰꇑꌋꆀꀉꁌꀊꁧꈧꌠꏃꎭ，ꐰꇑꑌꅈꑌ、ꈐꉘꉆꅉꉆꇈꎼ。ꑠꃅꄉꊂꇁꋍꈎꇬꊿꇬꋬꂻ，ꆿꍯꂷꌵꇁꑟꉂ！

ꉗꊂꈾꏤꆈꄮ，ꐧꊂꀀꏢꆻꄮ，ꅔꊂꍯꅪꉧꄮ，ꌩꑭꁯꎓꂿꄮ,ꇉꄩꇪꀮꁧꄮ，ꆀꃅꄔꊒꑠꂷꑌꇬꑟꇁ。ꆀꃅꄔꊒꒉꑵꉬ，ꀊꄙꊒꁌꒉ，ꏃꎖꊒꉜꏾ，ꀉꁆꊿꋅꃺꑌꊒꈩꏾ。ꏃꆪꄔꊒꄮ，ꇌꉘꇌꎶꌌꇁꁻ，ꃆꇭꃅꃨꄚꄉꋩ，ꅪꎔꅩꃨꄚꄉꌋ。ꀃꌋꀊꆨꐧꋦꀉꆹꇫꆹ：“ꌅꃀꇌꎶꊒ、ꀉꎵꁮꅰꊒ、ꀞꄂꃬꏿꊒ、ꃌꍸꃀꈴꁱꋐꒉꊒ”ꄷꉉ。ꄚꀃꑍꋋꄮ，ꐥꐨꐤꅉꌒꅉꑟꄮꇬ，ꅉꀕꈎꏅꄔꊒꌠꌡ,ꑞꋠꏾꑞꋠ,ꑞꈚꏾꑞꈚ,ꑓꅑꂿꇐꈤ,ꐕꇂꉺꍯꑌꄉꃅꑆꈏꄅꃅꑆꉇꄅꀋꑟꅉꀋꐥ,ꈌꅑꋠꇐꈤ,ꎸꃚꎸꃪꉜꊫꉛꎗꁯꇲꋠꃅꈌꀋꊌ。ꁨꆏꏸꑭꒃ，ꃮꀠꑿꅰꌌꇁꊒ、ꃬꀮꃬꎶꒃꇁꐗ，ꌩꎒꅩꇉꀕꌠꇬꎸꃚꀳꅿꌥꅿꉘ。ꎧꒉꇓꇤꄚꄉꇱ，ꀻꏮꀖꏮꎧꏸꄚꄉꂨ，ꌕꑍꌕꉖꄚꄉꑵ。ꑵꌠꇬꄉꑵ、ꉙꌠꇬꄉꉙ、ꐂꌠꇬꄉꐂ、ꀋꀀꃅꌋꏢ......

ꏃꆪꄔꊒ，ꀄꂼꑠꈁꄚꄉꄔꐊꐞ,ꆗꌠꉌꃀꑠꈨꄔꐊꐂ。ꃆꇭꐚꃰꏿꄮꇬ，ꆗꌺꉌꃀꐙꃰꏿ；ꀉꐔꂃꅪꆗꄮꇬ，ꄇꉼꋴꅪꈚꌠꋓꀒꆼꄧꈴꆹꄮ，ꌠꆗꈍꑌꁦꀑꁧꄩꏹꆹ，ꄔꊒꂷꇭꄔꉘꄔꅪꐩꆹ。ꄔꊒꆹꋚꑌꒉꎔꊒꌠꀊꄁꀋꉬꃅꑓꋪꂿꇐꊒꌠ，ꉈꑴꉂꏣꋩꑍꑠꂷꑌꉬ，ꀉꁆꊿꋅꃺꑌꄔꊒꈽꇁꌠ,ꇁꌊꆃꎬꑟꑲꆏ，ꋚꑌꄚꄉꊌꋠ，ꆫꇁꃬꅍꊰꑋꑟꌠꄚꄉꂿ，ꈜꀕꉂꏣꂵꇖꀕꌠꑌꄚꄉꊝꉆꌠ。ꏃꆪꄔꊒ,ꉂꌠꄚꄉꋍꁯꋍꑷꐛ，ꐞꌠꄚꄉꆀꇁꉷꃅꏹ。ꄹꃥꀕꌋꄚꄉꐂ，ꀑꆗꀊꌱꄚꄉꐂ，ꐮꂿꇁꌠꄮꈉꀁꎴꇨ,ꐮꐞꄮꇬꉌꃀꐮꊂꁠ。ꐞꁧꌠꄹꃥꊈ,ꆈꌠꐋꀨꐥꍂꆏꎺꌠ,ꉌꃀꈥꇤꀕꑌꄻꀋꅐ。ꊂꇁꑎꉔꄹꈎꆷꃹꑲꆏꄔꊒꄔꈩꇁꌦꅊꇈ，ꃥꈯꃥꈜꌠꆈꌠꈍꄮꑌꉌꃀꄔꊒꌡꄉꆍꏭꋩꎂꀕ！