ꆀꃅꄔꊒ

ꁱꊿ：ꐙꈌꐎꑳ

ꀘꊿ：ꐙꇐꑸꆀ

ꍏꉸꊿꋅꉬꊰꃘꃺꑌ，ꉌꈲꆏꏮꋩ、ꄅꋇꀆꐒꎭ、ꀒꋤꃅꋩꋓ、ꆈꌠꆏꄔꊒ。ꉢꉜꇬꈤꒉꄷꀋꁧꐋꀋꌡꐨꐥꌠꆏꉪꊇꆀꃅꄔꊒꐥ。

ꆀꃅꄔꊒ，ꄔꊒꇁꀦꇁꄩꆹꒊꆈꃅꄷꉉꌠ、ꇭꍏꃅꄷꉉꌠ、ꇨꑭꃅꄷꉉꌠꌊꆀꉪꊇꌧꍧꆃꎭꃅꄷꉉꌠꉉꈌꐯꀋꐊꋭ。ꄚꑠꉬꑴꇬ,ꄔꊒꄔꈩꌠꆏꒊꆈꃅꄷꉬꄿꂿ，ꇭꍏꃅꄷꉬꄿꂿ，ꇨꑭꃅꄷꉬꄿꂿ，ꉇꑴꉪꊇꌧꍧꆃꎭꃅꄷꑌꋋꈨ，ꇿꇬꑌꑠꃅꊒ，ꇿꇬꑌꑠꃅꈩ，ꋍꈓꋍꃢꌠꆏꈣꒉꃅꄉꄔꊒꄔꈩꇬꎷ。

ꆀꃅꄔꊒꋋꂷꆏ，ꋍꈓꈭꏝꇢꊭꇬꉪꆈꌠꃅꄷꈤꒉꐯꈤꒉꃅꋩꈩꌠꋩꑍꑠꂷ。ꀉꄙꄔꊒꒉꄷ，ꀉꄙꆽꇸꀀꅉꐱꇁꀭꄮ、ꒈꏂꁌꐘꃅꋋꈨꌠꇬꄉꀊꅰꃅꊒ。ꉌꃅꑓꌒꋧꄉꄔꊒꄔꈩ，ꉌꇿꑓꇿꏿꄉꄔꊒꄔꈩ，ꉌꈯꑓꈜꄅꄉꄔꊒꄔꈩ，ꈎꃅꆪꌒꄮꇬꄔꊒꄔꈩ，ꑍꇁꉖꌒꄹꉇꄔꊒꄔꈩ。ꄔꊒꋋꄹꉇ，ꆀꃅꌺꇖꐯꋧꐯꏑꋍꈚꏓꄉꅪꎔꅩꒌꄀꌠꌋ、ꃆꇭꃅꃨꋩꌠꋓ、ꇌꉘꇌꎶꁻꌠꋓ、ꆗꌺꀉꑣꇱꌠꋓ，ꉇꑴꑻꇁꁻꋓ、ꃬꀮꋖꋓ，ꌠꆗꑮꆜꈧꌠꉒꐎꇂꃴꉂꏣꎹ，ꉼꉹꁀꁻꉂꅇꄜ，ꆀꃅꉂꏣꄚꄉꎴ，ꉂꏣꄚꄉꈜꀕꎴ。

ꆏꉜꉏ，ꀊꄶꇌꉘꇌꎶꁺꅉꇬ，ꈭꀕꇍꀕꑓꆫꑓꈩꀊꋨꈨ，ꊾꀑꐮꐷꊾꑭꐯꄔꊾꈬꊾꄅꄖꄉꑘꀋꉬ。ꇌꉘꇌꎶꀊꏂꀈꋓꁵꌺꂶꀧꒊꑍꏢ，ꑓꏂꋘꉬꅍꐯꋘꇬꋍꃢꉆꈭꐨꆏꐂꇁꐯꀒꀵꑟ，ꇌꃚꃆꍀꀜ。ꈍꉗꏢꁻꈭꐨꆏꀊꏂꏡꌠꁻꊋꐛꀐ，ꇌꃚꇬꂪꌦꀊꅪꏢꄝꇬꄀꄉ，ꇌꌌꁈꇱꈻꌊꇌꁻꅉꇬꋍꈭꋍꏮꀕꇈ，ꀉꒉꏾꃅꋌꈻꌊꇫꈴꁧꀐ。

ꆏꉜꉏ，ꀊꄶꆗꌺꀈꑣꇱꅉꇬ，ꈭꀕꇍꀕꆫꇁꃬꌠꏞꃚꏇꃚꌊꆀꒈꃚꉏꃚꄩꆹꃅꃴꉼ，ꀏꆹꃄꅉꉼ。ꆗꌺꀈꑣꇱꌠꆏꂳꉢꂳꂅꊿꇨꑠꃅꇨꌠꐥꀋꇮ，ꉢꉜꇬꑍꂷꐯꇯꉌꂵꈐꏭꆹꌺꇨꂒꉻꉢꊌꄉꂓꅑꂒꋦꁧꎻꑟꃅꉪꄡꑟ。

“ꃆꇭꏢꐎꅐ，ꌳꈄꀘꆳꅐ，ꊿꎔꈑꒉꅐ”ꄷ，ꏢꐎꇁꄿꄉꄓꇁꌠꉬꐤꁮ，ꀊꄶꃆꇭꃅꃨꋩꋓꅉꇬ，ꀊꉘꌠꆗꈍꑋꃆꇭꃅꃨꋀꋩꏪꈜꃰꈭꀕꏭꌠꀂꏽꄉꐙꃰꏿ，ꃆꇭꃅꃨꈧꌠꇇꑭꐛꅉꀋꂿꃅ，ꀋꇊꅐꅑꃅꐚꐺꌠꌡ。ꃆꇭꈀꃨꅉꇬꈑꋍꆲꏂꄓꃅꄓ，ꉢꉜꇬꃆꇭꋩꋓꏪꈜꆲꏂꄓꄷꑵꌠꆏꋌꑵꌠꄜꏭꐛ。ꄽꂫꇬꂒꉻꈁꁠꊌꌠꆹꈍꑋꂷꀉꄂꐥꑴꇬ，ꉢꉜꎼꇁꇬꃆꇭꃅꃨꌌꄉꄚꄔꊒꄔꈩꅉꇬꋩꋓꇁꋋꈨ，ꋍꂷꉜꋍꂷꀋꃨꑠꂷꇫꀋꐊ，ꃶꐚꃅꀋꃨꑠꂷꇫꀋꐊ。

ꆀꃅꄔꊒꑍꃅꈩꌠꀋꉬꀋꉆꌠꆏꎔꌋꐘꌠ，ꀉꐔꅪꎔꈧꌠꋍꂷꋑꀋꋒꇷꄻꏦꄻꉦ꒜ꐍꏪꄡꄉꂃꏂꂃꅪꁯꆮꃰꃅꃰꈭꐨ，ꄩꏯꌝꏂꆫꁯꄵꄉꈁꑓꑅꎸꋌꁨꀕꅉꎔꅉꑟ。ꋀꊈ“ꅞꇊꉙ”、ꄊꄚꐂꃅꅷꇁꇬꆏ，ꈁꎔꈀꋽꀕꄉꉜꎼꇁꇬꃨꎔꃨꋽꁦꀑꂙꃨꀋꇊꌡ，ꉈꑴꃅꃴꃅꋮꐚꏷꏿꌠꄂꏂꄂꅪꈁꎔꈀꋽꀕꀊꋨꈨꑌꀋꇊꌡ。ꃀꌠꀿꃀꑌꇐꃪꇈꂒꉻꑌꀉꒉꀊꋨꈨꆏꀉꐔꅪꎔꁥꌠꇢꊭꇬꄉ，ꐛꇷꐛꏦꎃꀕꉜ、ꀑꑊꅪꁧꎔꀕꉜ、ꃅꇏꂶꄟꉽꀕꉜ、ꑌꇐꑲꇐꃪꀕꉜ、ꌧꇐꂿꇐꐤꐥꉜꃅꄉ，ꀉꐔꅪꎔꀑꌩꏾꎵꈁꎔꀕ、ꁱꐭꌗꅐꑖꈈꀕ、ꃅꇏꂶꄟꑻꈭꀕꈧꌠꋀꌋꌊ“ꐯꂙꃨ”、“ꐎꂙꃨ”ꌊꆀ“ꏂꂙꃨ”ꃅꄉꀐ。ꋀꊇꌊꅐꇁꌠꀉꐔꅪꎔꐯꂙꃨ、ꐎꂙꃨꌊꆀꏂꂙꃨꂒꉻꈁꁠꊌꋋꈨꈍꃅꎔꈍꃅꋽꀒ，ꈁꉜꈁꎔꀕ，ꈁꉜꈀꋽꀕ，ꇯꍝꃅꅪꎔꈬꇬꅩꒌꄀꊋꐚꌠꉬꑴ。ꋀꊇꆹꌟꃅꆗꌺꉌꃀꈐꏭꃅꃴꏸꋦꏸꄅꄕꅉꏷꌺꈁꉜꈀꌬꀕꍇꌠꉬꈜꁮ，ꌟꃅꆗꌺꉌꃀꈐꏭꒉꑍꅂꉖꌊꁁꆪꌺꈁꉜꈁꎔꀕꍇꌠꉬꈜꁮ，ꌟꃅꆗꌺꉌꃀꈐꏭꃨꎔꃨꋽꈁꉜꈁꃅꎔꌠꁦꀑꂙꃨꀭꌠꉬꈜꁮ。

“ꄔꊒꌕꑍꈩꇁꀜꅍꐥ，ꈎꏅꌕꑍꋠꇁꅝꅍꐥ，ꊿꀘꉻꏮꆫꇁꃬꅍꐥ”ꄷ，ꈩꑽꈩꋒꅍꀋꐥꌠꆏꄔꊒꌕꑍꐥ。ꄔꊒꌕꑍꐛꀊꋨꄹꉖꏃꃅꈊꅉꇀꅉꃄꄮꆏ，ꐭꇁꒉꀋꐥꊾꂷꆏꉇꈌꊒꇭꊏ，ꉇꈌꊒꇭꋀꊇꄔꌌꁧꐙꃅꈋꁍꑘꋚꋦꁍꇬꉮꁮꐗ,ꉇꈌꊒꇭꋀꊇꄔꌌꄔꊒꄔꈩꇓꈓꃅꏸꋦꃅꇫꄉꋦ。ꉇꈌꊒꇭꄔꐞꐝꅉꁨꅉꑟ，ꁨꅉꌫꅉꑞꄮꇬ，ꀊꉘꌠꆗꈧꌠꁀꁻꈶꃚꌒꌊꄔꈭꄔꇍꉜꄉꇁꀐ，ꅪꎔꈬꇬꅩꃨꄀꌠꌋꏭꉪꄉꇁ；ꀋꃋꑮꆜꈧꌠꂃꅪꁯꆮꃰꄉꄔꈭꄔꇍꉜꄉꇁꀐ，ꉌꂵꈐꏭꉂꅇꄜꇁꉂꊿꇰꏭꉪꄉꇁ；ꀊꉘꃮꆫꈧꌠꋪꅉꐁꅉꃅꄉꄔꈭꄔꇍꉜꄉꇁꀐ，ꈩꌒꀜꌒꇭꀧꉀꒆꐳꑞꁈꄉꇁ；ꀉꁌꀊꂵꁥꌠꑳꅝꃅꇴꁦꀑꉒꐎꄓꄉꇁꀐ，ꐥꌒꄻꌒꐥꐨꌒꆹꎴꑠꁈꄉꇁ。“ꅞꇊꉙ”ꌠ“ꅞꇊꉙ”，ꄊꄚꐂꌠꄊꄚꐂ，꒿ꌦꑵꌦꃅ，ꑵꌦꐁꌦꃅ，ꈍꃅꈩꑌꈩꇎꇁꀋꉆ，ꈍꃅꐁꑌꐂꇎꇁꀋꉆ，ꉌꃅꑓꌒꒉꇁꉏꃚꃅꃴꃅꅉꉼ。

ꉌꈯꑓꈜꆀꃅꄔꊒꀋꇁꇂ，ꌟꃅꐋꀨꇆ。ꉇꈌꀱꅐꉢꋐꄉ，ꉇꈌꊒꇭꉢꎭꄉ，ꆎꐊꇓꈓꁨꐞꄑꅉꈩꄉꄔꊒꄔꈩꆹꌦꂿ，ꆎꐊꁡꇤꐛꏀꁎꅉꏮꄉꄔꊒꄔꈩꆹꌦꂿ。