《ꄔꊒ》

ꁱ：ꀺꄮꃴꐂ

ꀘ：ꐙꇐꑸꆀ

ꄔꋩꋋꑍ

ꄔꊏꌕꁠꉂꏣꌕꑵꄜ

ꄔꊏꋍꁠꆏꀿꇁꃀꅇꄜ

ꄔꊏꋍꁠꆏꏣꇁꑟꅅꄜ

ꄔꊏꋍꁠꆏꃺꇁꑌꅇꄜ

ꄔꋩꋋꑍ

ꄔꋩ、ꄔꉙ、ꄔꎭꑍꎔꆿꍯꌵꑠꑍ

ꅞꇊ、ꋓꐂ、ꑵꃚꅲꌒꉇꑟꈻꑠꉓ

ꀉꉘ、ꌠꏀ、ꀿꃀꉌꃀꊷꆣꀕꑠꊭ

ꄔꋩꋋꑍ

ꑵꃚꇖꈭꀕꌠ“ꄔꊎ”ꉌꇬꑌ

ꉙꇐꁨꐞꄑꌠ“ꄔꊎ”ꑓꇬꀀ

ꈍꎞꆺꀕꂃꌠ“ꄔꊎ”ꈌꇬꁮ

ꄔꋩꋋꑍ

ꆀꃅꀉꉘꅽꎁꃅꉇꈌꎹꄉꃲ

ꆀꃅꀉꐔꅽꎁꃅꄔꊎꎭꄉꃲ

ꆀꃅꀉꂿꅽꎁꃅꃢꎔꈪꄉꃲ

ꆀꃅꀉꄉꅽꎁꃅꎧꎔꏿꄉꃲ

ꄔꋩꋋꑍ

ꃆꇭꃅꃨꄇꆹꀊꊛꊖꆈꆲꏂꄓꄉꋓ

ꇌꌦꇌꌋꇌꎶꃘꑴꊖꑭꊖꆈꄓꄉꁻ

ꑿꌦꑿꌋꒀꈩꉐꐞꂆꃚꉼꏒꀕꄉꁿ

ꄔꋩꋋꑍ

ꊿꎔꊾꃨꇤꃀꀈꑘꌡꌠꄚꄉꎔꌋꇁ

ꃅꇁꈄꌠꍜꇰꀉꇐꌡꌠꄚꄉꊋꇱꇁ

ꀘꌦꀘꌋꀋꌠꆿꋒꌡꌠꄚꄉꒌꈎꇁ

ꄔꋩꋋꑍ

ꄔꊎꋍꁠꈝꃀꋍꏢꁨ

ꉼꉸꑍꀽꉂꏣꑍꊱꌧ

ꁀꁻꌕꏢꁭꅉꌕꂷꉙ

ꄔꋩꋍꑍ

ꄔꅪꄔꊏꇬꄉꁤꇅꀕ

ꉂꏣꄔꊏꇬꄉꂴꍀꄓ

ꀉꐔꆗꌺꉂꐪꄚꈿꁤꐞꄑ

ꄔꋩꋋꑍ

ꊿꋅꄔꊒꁦꀿꈴꏦꊒ

ꐥꐨꊫꂫꎔꇁꃨꌠꊒ

ꇗꅉꄇꈜꍬꇁꌒꌠꊒ

ꆿꆠꍮꒌꐛꁯꄀꌠꊒ

ꐰꇑꈐꉘꋬꇁꂻꌠꊒ