《ꃅꇑꃅꌋ》
ꁱ：ꏃꍣꑽꉼ
ꀘ：ꇍꇖꀉꇤ
ꃅꑍꃅꉖꐊꄉꈧꌺꆪꌺꈹ
ꃅꈎꃅꆪꐊꄉꐰꇑꎭꈓꎹ
ꃅꏸꏁꐷꀕꄿꂿ
ꈧꌺꊷꆣꀕꅉꂿ
ꀄꂼꂻꐛꇁꄿꂿ
ꉠꒌꉢꐊꌠ，ꉠꆠꉢꐊꌠ
ꐰꇑꆹꃅꆳꂷꉐꌡꃅꐙ
ꉢꋌꏃꌊꃅꈋꐋꀋꌡꅉꇬꑟ
ꌋꐓꆈꅊꀕꅉꂿ，ꑓꁴꑰꀕꇤꄿꂿ
ꉢꆹꊋꇤꌊ，ꃅꇏꉾꌠꎹ，ꉪꐨꉾꌠꎹ
ꉂꏣꉂꑟꐰꇑꌌꀜꐞꀊꋨꈨ
ꂷꉐꋌꂿꋺ，ꃅꆳꋋꈨꋺ
ꉪꀋꐛꌠꉢ，ꀀꀋꌋꌠꉢ
ꉌꊰꌠꉬ，ꉌꎭꌠꉢ
ꐰꇑꈐꉘꏭ，ꀄꊭꍇꌠꉢ
ꑓꋪꈐꏭ，ꌒꌠꇿꌠꉪꌠꉢ
ꉢꉜꇬꋧꃅꆹꐍꊭꀕꌠꉬꎻꈁ
ꉢꉜꇬꐥꐨꆹꎵꑳꀕꌠꉬꎻꈁ
ꑠꃅꉉꇬ，ꐰꇑꆹꉢꌌꈜꑽꇬꎷ
ꌳꈄꌠꑌꉢꃅꋺ，ꌺꄸꌠꑌꉢꃅꋺ
ꈎꄜꀄꊭꌠꉬ，ꌧꅍꀋꐥꌠꉢ
ꃅꈋꃄꏦꆫꏾꌠꉢ
ꉪꐨꎹꄉꎭꇁꅧꌠꄜꌠꉢ
ꌧꇐꎹꄉꋧꃅꇣꄧꏮꌠꉢ
ꈎꄜꀄꊭꌠꉢ，ꉌꂵꒉꌠꉢ
ꈁꑓꑊꈜꅍꌠꉢ
ꐥꐨꍅꄉꀉꂿꎭꌠꉬ
ꃰꊿꇫꐥꌠ，ꊿꂂꊿꄸꎆꃀꀑꑊꄸ
ꉂꐪꆹꀃꌋꂾꀊꆨꐰꇑꌋꇽꄀ
ꄙꑋꈌꁏꌠ，ꑋꈌꉙꏦꀕꌠꌡ，ꉌꂵꊷꆣꀕꌠꌡ
ꐞꁧꈭꐨꆹ，ꅉꂫꌡꃅꋍꇅꇊꋍꇅꃅꄉꋌꅣꉠꉌꂵꊎ
ꃰꐛꆈꁌꀕꄿꂿ
ꉐꐙꆈꏸꀕꅉꂿ
ꌕꑍꋍꋚꋠꄿꂿ
ꌕꆪꋍꃢꈚꄿꂿ
ꋍꊂꇁꈭꐨ
ꉠꐰꇑꑞꅉꑟꈭꉠꈐꉘꑋꅉꑌꈭ
