ꁱꅫꃀꀄꊭꁵ

ꁱꊿ：ꀋꅙꏂꆿ

ꀘꊿ：ꅙꐚꃴꇤ

ꒈꂪꌕꇉꏭ，

ꆀꃅꀉꐔꊰꏁꈓꇈꉈ，

ꆺꑳꀿꃀꌋꆀꁍꇁꑖꒉꐞꇈꃲ。

ꆺꑳꀉꐔꑠꂷꑌ，

ꁮꇁꃈꅍꁦꄮꇬ，

ꑓꁴꀑꈑꇈꌋꆹꂸꌸ。

ꍶꇁꑾꌺꁧꇂꇉꄩꐥꇈꃲꑴꇬ，

ꆷꈻꉼꉹꀊꏂꇆꆉꈬꊂꀀꇊꃲꑴꇬ，

ꃆꏂꊂꑋ，

ꎹꄓꈧꌺꀈꆿꌕꎹꅐꇀꌦꅊꈫ。

ꀒ！

ꊿꋍꈨꋋꈨꄹꇬ，

ꁧꄩꎯꂚꃧꃨꀕꈍꀕꄮꆏ，

ꆀꃅꇖꈋꀉꐔꎔꀕꑌ，

ꐤꅉꎔꅉꑟꑵꉬꑴꄷ。

ꐊꇐꐊꌋꂄꄉ，

ꈯꄿꌋꆀꒌꆠꐮꐊꐙ。

ꃢꈚꇐꑌꌋꄉ，

ꄇꉼꋴꅪꁙꆺꀕꇈ，

ꐍꇠꏁꇠ、ꅻꊪꅻꃰꏋꇅꀕ。

ꉂꏣꉂꑟꄻꀳꉷꃅꏷ，

ꑭꐓꇇꐕꐧꋦꈬꏣꑳꏡꉩ，

ꑭꁘꐕꄉꁧꈐꁧꉈꐥꌒꈝꃀꎹ，

ꐧꊭꊋꃤꄚꈿꇙꈩꀕ。

ꀉꐔꐥꐨꊫꂫꑠꑵ，

ꈍꄮꉫꑌ，

ꎔꇁꃨꇬꎷꎂꀕ。