《ꍏꇭꍏꑷꇩꂱꎆꏣꌋꆀꐧꋦꀻꎆ
ꉬꈎꄐꎖꊯꉬꃢꌠꏤꄻꃆꂮꇖꐨ》ꃆꂮꉉꀽ
ꑮ ꏣ ꀻ
ꐋꀨꊈ：
ꍏꑷꍔꍞꏳꎁꃅ，ꉢ《ꍏꇭꍏꑷꇩꂱꎆꏣꌋꆀꐧꋦꀻꎆꉬꈎꄐꎖꊯꉬꃢꌠꏤꄻꃆꂮꇖꐨ》（ꄚꐰꆏꈝꐮꃅ《ꇖꐨ》ꄷ）ꁰꄻꌠꃆꂮꐥꌠꐛꐨꌌꐊꈴꃀꏭꉉꀽꂿ。
ꋍ、《ꇖꐨ》ꄯꒉꁰꄻꈴꎁ
ꐧꀠꀊꉗꊭꄐꎖꏤꄻꄉꎆꏣꐧꋦꀻꎆꌠꄐꇺꌠꆹ，ꉪꊇꄈꇩꏲꍔꄻꌠꃄꄟꀋꂿꑘꑵꉬ。“ꊯꇖꉬ”ꄐꎖꆹꎼꈎꆏꃅꌐꀐ，“ꊯꉬꉬ”ꄐꎖꎥꃪꏤꄻꄻꅐ。“ꊯꉬꉬ”ꄐꎖꎥꃪꏤꄻꌊꋒꇬ，ꉪꇩꏤꎆꏣꐧꋦꄹꇙꌊꐪꊛꄉꉾꃪꃅꀻꎆꄉ，ꏤꈉꈐꃅꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꅉꃀꀊꅰꃅꈫꈈꌠꌆꄻꄉꌠꇬ，ꈻꇐꀉꒉꀊꂾꃅꐥ。
ꎼꈎ1ꆪ，ꍏꑷꍔꍞꏳꐰꏤꄉꇬ，ꄈꅿꑍꊏꈭꇖꃢꐊꈴꃀꆹ“ꊯꉬꉬ”ꄐꎖꇖꐨꍤꇖ，ꁱꐘꁰꄻꊤꄻꄉ，ꉢꁳꊤꍈꃅ，ꐋꀨꅿꐃ、ꊆꃛꆀ、ꊵꐕ、ꄂꑩꑤꃛꊤꍈꃅꄉ，ꄚꃆꂮꐥꌠꌤꏲꅉꌋꆀꃅꄷꌄꇤꐋꀨꈧꌠꇫꐊꈽꄉ，ꍏꑷꍔꍞꏳꎮꊈꉼꏲꂠꌠꇂꃴꄉ《ꇖꐨ》ꄯꒉꁰꄻꌤꃅꌠꆹꄜꄉꃅ。2ꆪ11ꑍ，ꁱꐘꁰꄻꊤꆏꋍꃢꌠꐊꈴꃀꈿꄉ，《ꇖꐨ》ꄯꒉꁰꄻꌤꃅꌠꑌꐚꃅꃄꇬ。
ꄈꍏꑷꆏꋯꁦꍔꆙ、ꉪꋧꈲꐯꌠꌌꁱꐘꁰꄻꌤꃅꌠꈴꎁꇬꃅꐊꈴꌐ，ꃹꅼꃅꍤꄻꎥꃪꌠꃅ，ꀊꐯꈭꃅꋍꑞꋍꁁꏯꉜꐨꇕꅲ。1ꆪ22ꑍ，ꄈꍏꑷꆏ《ꄈꅿꑍꊏꈭꇖꃢꐊꈴꃀ“ꊯꉬꉬ”ꄐꎖꇖꐨꎥꃪꌠꏭꉜꐨꇕꅲꌠꃆꂮꅇꇰ》ꄜꃑꄉ，ꄈꈐꄈꉈꈍꈐꈨꇬꄉꉜꐨꇕꅲ。2ꆪꂫꇬ，ꄈꍏꑷꆏꍤꎥꊤ6ꂷꊥꇫꄉ，ꌜꐎꏃ12ꂷꇬꄉꌐꄉꍤꎥꒉ。ꋍꈭꐨ，ꄈꍏꑷꆹꍏꑷꌋꆀꇩꏤꌤꏲꅉꄹꁆꄐꁆꄉꎥꄝꀋꉬꀋꉆꌠ35ꐘꌌꎥꃪ。4ꆪ30ꑋ，ꉢꎮꉰꄉꊥꇺꄉꌜꐎꏃꈨ“ꊯꉬꉬ”ꊬꌠꇬꎆꏣꐧꋦꀻꎆꌠꑋꇖ꒜ꈿ。ꋍꈭꐨ，ꐋꀨꅿꐃꊋꁠꄉꂴꊁꃅꎆꏣꁆꏯ、ꈆꑪꇮꇐꁆꏯ、ꅉꂫꊐꌠꁧꎁꑋꇖꃀ3ꂷꈿ。ꉪꊇꉈꑴꈄꏍꇬꈴꄉꉜꐨꇕꅲꃅꈧꌠꃅꀐ，ꅇꉉꇬꊎꄉꇈꌠ300ꎖꃪꏢꎴꊊ，ꄚꃆꂮꐥꌠꁁꏯꆏꄚꈐꏭꄉꇖꐨ1500ꎖꏢꏓꄻꎼꇁ。ꋍꑞꋍꁁꏯ꒞ꈴꃅꉜꇬ，ꄈꅿꑍꊏꈭꇖꃢꐊꈴ꒜ꀋꉬꀋꉆꃅ“ꊯꉬꉬ”ꄐꎖꇖꐨꌤꃆꎥꃪꌠꆹ，ꀊꅰꉾꃪꃅꇩꏤꀻꎆꄐꎖꌠꄐꇐꏤꁈꍝꄎꂿꄐꋊꇤ，ꀒꁨꋍꁘꃅꄈꑭꊂꇩꏤꑭꊂꊿꋅꈁꐥꌠꏓꂱꋯꑌꃅꀒꁨꉜꄉꂵꌠꊋꃤꀉꇨꌠꏓꋧꎼꇁꄉ，ꍏꇩꈁꏦꐛꏀꈴꌠꌌꐊꑷꃅꇩꏤꀉꇨꌠꋈꄻ、ꊿꋅꀱꌄꆣꇁꌠꌤꑘꇰꀋ꒜ꌠꄹꎆꌠꇬ，ꈻꇐꀋꂿꑘꃅꐥꌠꉬ。ꏓꇱꊨꇽꇬ，“ꊯꉬꉬ”ꊬꌠꉪꇩꏤꀻꎆꌠꈀꊝꎍꌠꄐꇐꏤꁈꊜꋽꄮꌋꆀꃨꆰꐨꋓꎭꌠꋍꋓꃅꐥ，ꊨꀋꄅꉪꎖꊋꌠꐊꊈꁦꎆꇁ，ꄚꉪꇩꏤꎆꏣꐧꋦꀻꎆꌠꀊꉗꃅꉾꇁꌠꇬꄘꄏꇎꏦꌋꆀꀑꐱꆸꄟꐛꀋꐈ。ꋍꑞꋍꁁꏯꁊꈴꃅꉘꇉꇬ，“ꊯꉬꉬ”ꊬꌠꎆꏣꐧꋦꀻꎆꌠꉻꄜꉪꈜ、ꏥꏦꀉꒉꀊꂾꌠ、ꁻꌐꀋꉬꀋꉆꌠ、ꄐꇐꏤꁈꂿꃆꌋꆀꃄꁈꀉꒉꀊꂾꌠꊨꄅ，“ꊯꉬꉬ”ꊬꌠꊇꁧꀊꂥꃅꀻꎆꌠꄹꇙꄉ，ꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꅉꃀꀊꅰꃅꈫꈈꌠꌆꄻꄉ。
8ꆪ4ꑍ，《ꇖꐨ》ꄯꒉꃑꌌꄈꈐꈍꈐꈨꇬꄉꉜꐨꇕꅲ，ꄈꈐꐋꀨꀉꆹꄹꁆꉜꐨꇕꅲꌠꄚꐊ，ꉈꑴꌐꄉꋯꁦꄈꀾꈁꐥꌠꍏꑷ、ꇩꏤꑭꊂꇬꎭꆃꌄꇤꊿꌋꆀꄈꀾꀋꐊꊿꂒꋦꌠꁧꎁꉜꐨꇕꅲꀐ。ꉜꐨꇕꅲꐛꐨꇬꈴꄉꉜꇬ，ꃅꄷꈁꐥꌠꌤꏲꅉꈁꐥꌠꆏ《ꇖꐨ》ꄯꒉꏭꋒꐯꋒꃅꏚꍆꀐ。ꈀꄸꉜꇬꑌ，《ꇖꐨ》ꄯꒉꎃꊒꃅ“ꊯꉬꉬ”ꊬꌠꄈꌋꆀꇩꏤꌤꑘꀻꎆꌠꇫꎍꌠꐩꋊꉆꈉꒃꌫ，ꃹꅼꃅꉪꇩꏤꀻꎆꋦꈭꇬꊝꎍꌠꃹꅼꌼꇪꃅꐛꐈꌠꎥꃪꄉ，ꋌꊂ5ꈎꀻꎆꌠꏭꀑꋾꄐꄻꌠꌋꆀꄐꇐꏤꁈꄐꄻꌠꃅꅐꇁ，ꄐꇺꌐꏦꈆꑪꊒꌸ，ꁻꌐꀋꉬꀋꉆꌠꂿꐚꊨꄅ，ꂿꃆꃄꁈꇯꍝꌠꎹꃶꐚꌠꃅ，ꐛꐨꐊꄉꀒꁨꆹ、ꐪꊛꄉꍏꇩꈁꏦꐛꏀꈴꋈꄻꌠꄹꎆꌠꉈꑴꈁꉬꄖꄑ、ꈁꉬꄐꁆꃢꉫꌦ，ꐪꊛꄉꎆꏣꐳꃅꀻꎆꌠꌋꆀꐧꋦꀊꉗꃅꎍꐽꌠꊿꋌꇰꌠꀉꒉꋋꑍꐘꀊꏀꁬꁰꄻ、ꊋꇤꄉꍏꇩꈁꏦꐛꏀꈴꋈꄻꐛꊂꀊꏀꌠꀹꄻꌠꐩꋊꑴꇙꐨꄜꅐꇁꀐ，ꈍꃅꑌꄈꌋꆀꇩꏤꌤꑘꀻꎆꌠꇬꑌꑲꐨꀉꒉꀊꂾꇈꃹꅼꌠꐥꇁꎂꀕ。ꋍꈭꐨ，ꋍꑞꋍꁁꏯꉜꐨꌋꆀꇖꐨꉾꃪꌠꀉꑌꈨꄜꎼꇁꀐ。ꁱꐘꁰꄻꊤꋍꏢꋍꏢꃅꎥꃪꄉ，ꌬꉆꌠꆏꄾꌦꋩꃅꌌꌬꃅꄉ，《ꇖꐨ》ꄯꒉꌌꁦꎆꃅꁱ、ꄺꀱꄉꁱ、ꁱꂷꅧꊨꌠꐯꇯ218ꈚꐥ，ꋍꑞꋍꁁꏯꉜꐨꌋꆀꇖꐨ452ꏢꇬꉱꑷ。
《ꇖꐨ》ꄯꒉꁰꄻꊬꌠꇬ，ꍏꑷꍔꍞꏳꎮꊈꉼꃀ3ꃢꈿ、ꍏꑷꍔꍞꏳꃀ2ꃢꈿꄉꍤꇖ、ꄺꀱꇈ，ꄜꏮꌊꋌꃢꐊꈴꃀꁳꍤꇖꎻꌠ《ꇖꐨ》ꄯꒉꏓꐛꀐ。
ꑠꃅꉉꉆ，ꋌꃢꁱꐘꄯꒉꁰꄻꌤꃅꌠꆹ，ꄈꈒꇓꋯꁦꌠꌋꆀꈴꎁꇬꃅꏓꂱꋯꁦꌠꍔꆙꌠꉈꑴꋍꃢꉾꃪꃅꃄꄻꌠꉫꌦ。
ꑍ、《ꇖꐨ》ꄯꒉꁰꄻꇬꀋꉬꀋꉆꃅꉪꏡꌠꌋꆀ《ꇖꐨ》ꄯꒉꅉꀨꐊꇐ
《ꇖꐨ》ꄯꒉꁰꄻꇬꉻꄜꉪꏡꌠꆹ，ꄈꅿ꒜ꀉꒉꑍꊏꃢꌠꈿꇬꏤꅐꇁꌠꐊꑷꃅꐧꋦꉪꏦꐛꏀꈴꌠꇩꏤꀉꇨꌠꋉꐛꌠ“ꑍꁘꃅꈴ”ꌠꄐꇐꏤꁈꄐꁆꌠꇬꈴꄉ，ꎃꊒꃅ“ꊯꉬꉬ”ꊬꌠꀑꐱꃅꐧꋦꉪꏦꐛꏀꈴꌠꃅꇫꑟꌠꈴꎁꇬꀋꂿꑘꌠꉆꈉꒃꌫ，ꃹꅼꃅꇩꈐꇩꉈꃅꒊꃅꇁꎥꃪꄉ，“ꊯꉬꉬ”ꊬꌠꇬꉪꇩꏤꎆꏣꐧꋦꀻꎆꌠꇬꉻꑫꃅꏂꇫꌋꆀꄐꇐꏤꁈꄐꁆꌠꏤꄻꅐꇁ。
《ꇖꐨ》ꄯꒉꁰꄻꈴꎁꇬ，ꉪꊇꋓꉪꁨꄉꄚꐰꋋꈍꑋꍈꒃꌫ。ꋍꆏꁻꌐꍝꄎꌋꆀꌤꃆꍝꄎꌠꌭꈬ，ꅉꃀꌆꈬ、ꐊꑷꃅꊋꇤꌠꅉꀨꉆꈉꇬꉆꄉ，ꀑꐱꃅꐧꋦꉪꏦꐛꏀꈴꌠꁻꌐꃅꇫꑟꌠꎁꃅꀊꅰꃅꈫꈈꌠꅉ꒜ꌆꄻꌠꌌꑓꉜꅉꃅꄉꉻꑫꃅꏂꇫ，ꊋꑌꃅꊱꁨꃅꇿꋌꐥꃅꋧꃅꉐꈎꐛꁏꐨꃅꒊꃅꇁꀊꏀꌠꌋꆀꀻꎆꅉꇬꌤꃆꑓꅐꎑꌠꌌꊋꏿꅉꃅꄉꀋꇎꀋꂪꅉꅋꑣ、ꊋꁧꅉꄻꀉꇨ。ꑍꆏꉻꑫꉪꏣꌭꈬ，ꏓꇲꃅ“ꉬꑵꋍꉻ”ꏓꇱꄐꉻꄹꎆ、ꋮꄮꃅ“ꇖꑵꐊꑷ”ꄐꇐꄐꉻꄹꎆꌠꇖꐨꇬꈴꄉ，ꐊꑷꃅꎆꏣꐧꋦꀻꎆꌠꌋꆀꄈꋈꄻꌠꋍꑞꋍꁁꏯꌤꃅꌠꄐꁆ。ꌕꆏꀒꁨꋍꁘꃅꐊꑷꃅꃹꅼꃅꄺꀱꌠꌭꈬ，ꄺꀱꏡꁈꌫꄻꄉꀻꎆꌤꃆꊋꋠꌠꂥꀘꌠꉜꁨꄉ，ꀻꎆꌠꎁꃅꇙꊋꁦꎆꇱ、ꍄꑐꊋꃤꄖꄑ。ꇖꆏꉇꉻꏭꁉꃑꌠꍔꒉꌠꌭꈬ，ꀻꎆꌠꌌꊨꏦꊋꃤꅉꃀꀂꏽꄉꇈ，ꉈꑴꅉꆺꑭꊂꐊꊈꌋꆀꃷꎏꅐꀦꑌꏓꇲꄉꌬꋒ。
《ꇖꐨ》ꄯꒉꆏ15ꈨꌌꏓꐛ，ꁸꌊꀉꒉꌕꑵꃅꄉ。ꋍꑵꌠꆏꋍꈨꌠ、ꑍꈨꌠ2ꈨꇫꐊ，ꏓꇱꉉꈻꌠꉬ，ꀋꉬꀋꉆꌠꆏ“ꊯꇖꉬ”ꊬꌠꇬꉪꇩꏤꀻꎆꌠꊌꐨꀉꒉꀊꂾꌠꊌꐨꊌꅜ、“ꊯꉬꉬ”ꊬꌠꇬꀑꐱꃅꐧꋦꉪꏦꐛꏀꈴꌠꃅꇫꑟꌠꈴꎁꇬꂴꊪꊁꊛꌠꉆꈉꀋꂿꑘꌠꐥ、“ꊯꉬꉬ”ꊬꌠꇬꉪꇩꏤꀻꎆꋦꈭꆹꃹꅼꃅꌼꇪꃅꐛꐈꌠꊝ、“ꊯꉬꉬ”ꊬꌠꇬꎆꏣꐧꋦꀻꎆꌠꄐꇺꉪꇐ、ꍬꌬꌠꏥꏦꌋꆀꀋꉬꀋꉆꌠꁻꌐꑠꐊꇐꉉꈻ。ꑍꑵꌠꆏꌕꈨꌠꅑꊯꇖꈨꌠ12ꈨꌠꇫꐊ，ꁸꄉꉉꈻꌠꉬ，ꀋꉬꀋꉆꌠꆏꃅꇴꄉꉻꌋꆀꀊꉗꀊꎴꌠꇬꃆꂮꐥꌠꌤꃆꀋꉬꀋꉆꌠꇬꉜꄉ，ꁁꏯꁸꄉ“ꊯꉬꉬ”ꊬꌠꇬꄐꇐꏤꁈꂿꃆꌋꆀꃄꁈꀉꒉꀊꂾꌠꄐꁆ，ꅐꑘꀻꎆ、ꈆꑪꇮꇐꏀꀺ、ꇩꈐꃷꎏ、ꎆꏣꏦꉻ、ꉇꉻꏭꁉꃑ、ꑣꋂꄖꄑꌄꆣ、ꃄꁕꀻꎆꌠꇬꄉ，ꅑꅸꁱꀕꋈꄻ、ꉹꁌꐥꐨꏦꀧ、ꀊꃴꀻꎆ、ꋬꂻꀻꎆ、ꇩꐏꋈꄻꑠꀋꉬꀋꉆꁆꏯꇬꉪꈜꌋꆀꌤꃅꀋꉬꀋꉆꌠꊨꄅꄉ。ꌕꑵꌠꆏꊯꉬꈨꌠꌋꆀꅇꂫꇫꐊ，ꀋꉬꀋꉆꌠꆏꄈꍏꑷꏓꋧꋍꃱꃅꏲꂠꌠꌭꈬꌋꆀꊋꀥꇱ、ꐧꋦꉪꏦꋯꁦꏦꏲꋈꄻꌠꄹꎆ、ꇤꀎꄠꌤꃅ、ꃰꊿꊫꂫꐮꐊꄜꏓꄻꌠꄹꇙ、ꋒꐯꋒꃅꐧꋦꑭꊂꏣꀋꑌꐨꑴꇙꐨꀹꄻꐨꄖꄑꑠꂿꃆꄐꁆ。
ꌕ、ꉉꀽꄻꅐꌠꌤꃆꀋꉬꀋꉆꌠꈍꑋꏢ
《ꇖꐨ》ꄯꒉꇬꉜꐨꀋꂿꑘꌠꌋꆀꃄꁈꀉꒉꀊꂾꈨꄜꎼꇁꀐ。ꄚꇬꆏ，ꋍꈐꏭꇬꌤꃆꀋꉬꀋꉆꌠꈍꑋꏢꌌꄉꀑꐱꃅꉉꀽꂿ。
ꋍꏢꌠ，“ꊯꉬꉬ”ꊬꌠꉆꈉꀋꂿꑘꌠꃆꂮ。ꐧꋦꉪꏦꐛꏀꈴꌠꃅꇫꑟꌠꆹꅂꊐꌡꃅꊛꄉꁨꆹ、ꀋꆏꃅꀻꎆꁨꎆꌠꐩꋊꈴꎁꏢꉬ，ꀋꆏꃅꊋꇤ、ꊛꄉꉈꈽꄻꅐ。《ꇖꐨ》ꄯꒉꄜꎼꇁꇬ，“ꊯꉬꉬ”ꊬꌠꇬꀑꐱꃅꐧꋦꉪꏦꐛꏀꈴꌠꃅꇫꑟꌠꈴꎁꇬꂴꊪꊁꊛꌠꉆꈉꀋꂿꑘꌠꐥ，ꋋꆹ“ꊯꉬꉬ”ꊬꌠꆹꄜꄡꑟꌠꐩꋊꂿꃆꇬꈴꄉꊨꇽꅐꇁꌠꉬ。ꄈꅿꃀꀉꒉꑍꊏꃢꌠꏤꄻꎼꇁꇬ2035ꈎꑟꇬꆏꀑꐱꃅꐧꋦꉪꏦꐛꏀꈴꌠꃅꇫꑟ。“ꊯꇖꉬ”ꊬꌠꆹꉬꈎꋍꃢꌠꉬ，ꅉ꒜ꈫꈈꌠꌆꄻꄉ，ꇬꂂꄻꂂꌠꃅꇫꑟꀐ。“ꊯꉬꉬ”ꊬꌠꆹꅉꃀꌆꈬ、ꐊꑷꃅꊋꇤꌠꀋꉬꀋꉆꊬꌠꉬ，“ꊯꉬꉬ”ꄐꎖꌠꏤꄻꌋꆀꃄꌬꋒꑲꆏ，2035ꈎꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꅉꃀꀊꅰꃅꈫꈈꌠꌆꄻꄉꄎꌠꉬ。
《ꇖꐨ》ꄯꒉꆏꅉꀨꉆꈉꋋꏢꇬꄉ“ꊯꉬꉬ”ꊬꌠꀻꎆꌠꏂꇫ，“ꊯꇖꉬ”ꄐꎖꇬꄜꎼꇁꌠꉪꉻꉈꑴꉪꈜꌋꆀꐪꊛꐨꐥꇬꎷꇈ，ꉈꑴꎃꊒꃅꋌꊂ5ꈎꉪꇩꏤꀻꎆꃅꒊꃅꇁꀉꒉꌠꒃꌫꄉ，ꃶꐚꐛꐨꇬꄐꊒ、ꂴꂿꐨꐥꌠꉻꄜꉪꈜ、ꏥꏦꀉꒉꀊꂾꌠ、ꁻꌐꀋꉬꀋꉆꌠ、ꄐꇐꏤꁈꂿꃆꄜꎼꇁ。ꄮꈉꌍꑓꋋꂷꒃꉇꄉ，ꂱꎆꅑꌠꄻꈫꈈꀹꐯ、ꆹꊎꏢꑲꌠꀜꋊ、ꀋꇎꀋꂪꊋꁧꅉꅋꑣꄻꀉꇨ，ꇩꏹꋓꅔꃛꅉꇬꄉꄐꇐꏤꁈꑴꇙꐨꊌꅜ，ꍏꇩꈁꏦꐛꏀꈴꌠꃅꇴꄉꉻꇬꃆꂮꐥꌠꄐꇐꏤꁈꂿꃆꀉꒉꃅꂵꊌꌠꄹꇙ，ꀑꐱꃅꐧꋦꉪꏦꐛꏀꈴꌠꃅꇫꑟꌠꏤꇽꐨꐥꃅꁨꎆꐨꊌꅜꌠꄉꀧ。
ꑍꏢꌠ，“ꊯꉬꉬ”ꊬꌠꎆꏣꐧꋦꀻꎆꁻꌐꃆꂮ。ꈆꑪꃅꀻꎆꁻꌐꄐꄻꌠꆹ，ꉬꈎꄐꎖꏤꄻꌋꆀꃄꌬꋒꌠꇬꀋꂿꑘꐯꀋꂿꑘꌠꉬ。《ꇖꐨ》ꄯꒉꆹ“ꊯꉬꉬ”ꊬꌠꅉꀨꏤꈉꌋꆀꋍꊭꃅꐙꌠꇖꐨꒃꌫꄉ，ꎆꏣꐧꋦꀻꎆꌠꁻꌐꀋꉬꀋꉆꌠꊨꄅꄉꀐ。2035ꈎꀑꐱꃅꐧꋦꉪꏦꐛꏀꈴꌠꃅꇫꑟꇬ，ꌐꉻꐨꐥꌠꌐꁧꀋꂿꑘꏢꆏꊾꂷꐽꏡꇩꈐꒃꅐꈁꊌꁌꐨꆹꐧꀠꏠꌠꐞꄿꇩꏤꑟꐨꇬꑟꌠꉬ，ꋋꆹ“ꊯꉬꉬ”ꊬꌠꎆꏣꐧꋦꀻꎆꐳꐨꄉꄐꃅꐙꇬꎷꄷꇖꂟꌠꉬ。《ꇖꐨ》ꄯꒉꆹꃹꅼꃅꎥꃪꌋꆀꈆꑪꃅꉉꊪꌠꅉꃀꀂꏽꄉ，ꎆꏣꉀꎆꌠꋭꋽꅉꇬꎍꇬꎷ、ꈁꉬꐊꊈꒃꅐꐨꎍꐽꃅꉀꐕ、ꎆꏣꉀꎆꊋꂫꋒꐯꋒꃅꋊꃑꌠꊌꅜ、ꀀꊿꊌꐨꉀꎆꌠꌋꆀꎆꏣꉀꎆꌠꐮꐊꐙ、ꑘꃅꃄꎆꉀꐕꌠꌋꆀꑘꃅꒃꅐꐨꉀꐕꌠꐮꐊꐙ、ꊌꐨꐧꀠꃅꐙꌠꊿꈧꌠꐪꊛꄉꍔꒉꑠꁻꌐꀋꉬꀋꉆꌠꄜꎼꇁ。ꋍꈭꐨ，ꀋꃅꋋꊭꇬꇩꈐꎆꏣꀁꋌꊰꍅꊋꁦꎆꇱ、ꇿꋌꐥꌠꈉꐨꀋꇎꑠꑓꅐꎑꌠꌤꃆꇬꈴꄉ，《ꇖꐨ》ꄯꒉꆹꀀꊿꌬꈧꐨꄇꇖꀕꃅꉀꐕ、ꈒꇓꈉꐨꎆꏣꉀꎆꌠꇬꈺꇙꌠꇙꊋꀋꉬꀋꉆꌠꂿꄐꐪꊛꄉꀉꇨꇁꑠꁻꌐꄜꎼꇁ。
ꋌ꒜ꃄꄟꇬꉜꄉ，《ꇖꐨ》ꄯꒉꆹ“ꊯꉬꉬ”ꊬꌠꎆꏣꐧꋦꀻꎆꁻꌐꀋꉬꀋꉆꌠꆏꐛꊈꏤꄻꇖꐨꉬ，ꄻꅐꌠꃷꁨꏤꄻꇖꐨꌋꆀꑭꋧꌤꃅꄐꁆꈨꆏꊏꄐꎖ《ꐱꀨ》ꏤꄻꄮꇬꁳꎥꃪꏤꄻꄉ，ꀊꅰꉾꃪꃅ《ꇖꐨ》ꉻꒉꄐꇺꂿꄐꄛꑣꌋꆀꋊꇤꎻꄷꄜꎼꇁ。
ꌕꏢꌠ，ꊇꁧꀊꂥꃅꀻꎆꌠꄹꇙꌠꌌꅇꀨꃅꄉꃆꂮ。《ꇖꐨ》ꌋꆀ“ꊯꇖꉬ”ꄐꎖꆹꐯꊛꅷꇁꌠꉬ，ꐪꊛꄉꊇꁧꀊꂥꃅꀻꎆꌠꄹꇙꌠꏤꄻꌊ“ꊯꉬꉬ”ꊬꌠꎆꏣꐧꋦꀻꎆꌠꅇꀨꃅꄉ，ꎆꏣꋈꄻꌠꌌꈯꄜꃅꄉꌠꌭꈬ，ꐛꒆꊒꌸꐊꑷꃅꀻꎆꉪꉻꀊꏀꌠꃄꌬꈴ，ꊇꁧꇿꋌꐥꃅꉀꐕꌠꌋꆀꃷꁨꋭꋽꃅꉀꎆꌠꃅꇫꑟ，ꎆꏣꐪꊛꄉꉾꃪꃅꀻꎆꌠꌋꆀꐧꋦꐊꑷꃅꀻꎆꌠꄹꇙꄷꇖꂟ。ꊇꁧꀊꂥꃅꀻꎆꌠꄹꇙꇬ，ꀋꂿꑘꐯꀋꂿꑘꌠꆏꐳꃅꑟꐨꀊꂥꌠꈆꑪꇮꇐꑴꋦꑴꇨ，ꏣꀋꑌꃅꊈꏀꒃꅐꊋꃤꀻꎆ，ꈆꑪꇮꇐꏀꀺꌠꄹꇙ、ꐳꃅꇙꊋꀊꏀꌠꉘꉚ、ꎆꏣꐛꉻꄻꃪꊐꐕꌠꊥꎆꌠꇬꄉꃶꐚꐨ、ꂵꅐꐨꐥꃅꁨꎆꌠꊌꅜ。
《ꇖꐨ》ꄯꒉꆹꈆꑪꇮꇐꏀꀺꌠꄐꏁꂿꄐꄻꀨꇬꄉ，ꐛꏀꈴꅐꑘꉻꑫꋈꄻ、ꐳꃅꑟꐨꀊꂥꌠꈆꑪꇮꇐꑴꋦꑴꇨ、ꐳꃅꎆꏣꐧꋦꀻꎆꌠꐊꑷꃅꀊꃴꉹꏮꑠꁁꏯꄐꁆꎼꇁ，ꋊꃅꅐꑘꄻꃪꉀꐕ，ꏀꄓꅐꑘꌋꆀꃆꏂꊂꑋꅐꑘꉘꉚꀉꇨꇁ，ꐥꄜꎆꏣꅉꀨꄻꈫꈈꄻꀉꇨꄷꄜꎼꇁ；ꊋꀥꇱꄉꇬꀦꏀꀺꌠꌋꆀꀋꉬꀋꉆꌠꈯꄜꇮꇐꈢꇓꀖ，ꈆꑪꇮꇐꏀꀺꌠꌋꆀꅐꑘꏀꀺꌠꃹꅼꃅꐮꏓꐊꌠꄹꇙ，ꋍꉻꃅꂘꑘꈆꑪꇮꇐꌧꊿꀻꎆꌠꄹꎆ，ꃹꅼꃅꃷꂷꍏꇩꋈꄻꌠꄹꎆꄷꄜꎼꇁ；ꐳꃅꀊꏀꉹꌠꊋꀦꉻꑫꋈꄻ，ꐳꃅꀊꃴꒃꅐꐥꐨꐤꄟꏓꐛꄷꄜꎼꇁ。ꋓꉪꁨꌶꌠꆏ，ꊈꏀꒃꅐꊋꃤꀻꎆꇬꊇꁧꇎꏦꈨꐤꄻꅐ，ꋒꐯꋒꃅꀋꃅꃅꉆꐨꉪꏢꌶ，《ꇖꐨ》ꄯꒉꈍꃅꋭꅉꈍꃅꃅꄉꊈꏀꒃꅐꊋꃤꀻꎆꄷꊡꀱꌠꆹ，ꈀꄸꑌꄐꏁꌌꈆꑪꃅꉪꍆ、ꑞꉬꌠꑞꃅꄉꌤꃅ，ꂇꉗꄉꃅꌠꄴꏮꄷꌠꉬ。
ꇖꏢꌠ，ꇩꈐꀰꏮꀉꒉꌠꄻꀉꇨ、ꇩꈐꇩꉈꀰꏮꑍꑵꌠꄻꁣꀋꐥꃅꄉꃆꂮ。ꉇꉻꋦꈭꀊꅰꃅꊋꋠꌼꇪꑲꆏ，ꀊꅰꃅꐳꃅꀻꎆꐛꊂꀊꏀꌠꏓꄻꄉ，ꏟꈯꀕꃅꀻꎆꑴꇙꌅꈌꒃꌫꌶ。ꀋꃅꋋꇅꇬꌋꆀꋌꊂꋍꊭꇬ，ꇩꈐꀰꏮꀉꒉꌠꄻꀉꇨꌠꌭꈬ，ꐳꃅꇩꈐꎆꏣꀰꏮꉻꑫꀉꇨꌠꏓꐛꄉ，ꇩꈐꀰꏮꌠꎍꐽꐨꌌꇩꏹꀰꏮꊨꀋꄅꐨꏭꊝꌶ。
《ꇖꐨ》ꄯꒉꆹꇩꈐꀰꏮꀉꒉꌠꄻꀉꇨꌠꄻꀨꇬꄉ，ꇩꈐꃷꎏꀉꇨꌠꋈꄻ、ꐳꃅꑟꐨꀊꂥꌠꐧꋦꉪꏦꃷꎏꎆꏣꏦꉻꋈꄻꌠꏭꄐꁆꎼꇁ，ꊡꀱꇬꈒꇓꈉꐨꍔꒉꌠꄐꇐꏤꁈꅉꀨꋋꏢꌭꈬ，ꉹꁌꐥꐨꈲꁵꌠꌋꆀꌬꈧꌠꊥꎆ、ꎊꇐꀂꏽꎆꇱꌠꌋꆀꊿꀂꏽꎆꇱꌠꑖꑟꃅꄻꐯꇯꎼꇁꌠꌭꈬ，ꊋꀉꒉꃅꇤꄉꌬꈧꌠꄖꄑ，ꇿꋌꐥꃅꎆꇱꌠꍔꒉ，ꏟꈯꃅꇩꏤꑭꊂꋍꃱꃅꌠꃷꎏꀉꒉꋈꄻꌠꇬꋍꅉꇊꅉꀜꋊꇧꎭ，ꊡꀱꇬꋒꐯꋒꃅꋍꑞꋍꉹꀰꏢꀨꄜꍄꑐꊋꃤꄖꄑ，ꐳꃅꐊꊈꃷꎏꈴꁆꄻꏦꉻꉺꏦꄻꉾꃪ，ꉻꒉꎆꏣꏱꄻꇿꋌꂿꄐꉀꐕ。ꋍꈭꐨ，ꇩꏹꀰꏮꌠꍔꒉ，ꎍꐽꃅꄹꏦꉹꌠꁉꃑꌠꍔꒉ，ꀉꑌꁁꏯꃼꇇꏦꉻꀧꌋꃅ，ꊇꁧꀊꂥꃅꐯꇯ“ꋍꁕꋍꈜ”ꋈꄻꄷꄜꎼꇁ。
ꉬꏢꌠ，ꏓꂱꈁꐥꌠꃅꐯꇯꌣꈚꇁꌠꑭꁘꏟꈯꃅꐕꎼꆹꃆꂮ。ꍏꇩꈁꏦꐛꏀꈴꌠꆹꏓꂱꈁꐥꌠꃅꐯꇯꌣꈚꇁꌠꐛꏀꈴꌠꉬ。ꄈꅿꃀꀉꒉꊰꉆꃢꌠꈿꊂꅑꅸꇁꌠ，ꉪꊇꀋꎪꃅꇬꂾꉪꐨꎺ，ꏓꂱꉆꈉꇬꉆꄉꌤꃆꉪꏡ，ꃄꁕꋮꄮꃅꀻꎆꌠꄹꇙ，ꏁꁈꊋꑌꌠꏁꌬꄉꉹꁌꐥꐨꏦꀧꌋꆀꄻꃪ，ꎭꇔꈢꇓꀖꌠꃅꊋꐛ，ꐊꑷꃅꊼꇅꌣꈚꌠꐧꋦꄻꐛꄉ，ꐯꇯꌣꈚꌠꊥꎆꌠꎁꃅꇎꏦꉾꃪꌠꀹꄻꄉꀐ。《ꇖꐨ》ꄯꒉꆹꉪꇐꄐꇺꅉꇬꄉꄞꅐꃅꏓꂱꈁꐥꌠꃅꐯꇯꌣꈚꇁꌠꑭꁘꏟꈯꃅꐕꎼꆹꄷꊡꀱ，ꋋꆹ“ꊯꉬꉬ”ꊬꌠꎆꏣꐧꋦꀻꎆꌠꉻꄜꃅꐙꌠꇖꐨꏢꉬ。
《ꇖꐨ》ꄯꒉꆹꏟꈯꀕꃅꐯꇯꌣꈚꌠꁻꌐꇖꐨꒃꌫꄉ，ꉹꁌꐥꐨꏦꀧꌋꆀꄻꃪꌠꇬꆼꒆꄉ，ꊇꁧꀊꂥꃅꋒꐯꋒꃅꃅꅍꊌꌠꊥꎆ、ꊌꐨꁷꄻꄹꏦꄻꉾꃪ、ꏓꂱꉌꃹꌠꂘꑘꀞꄻꋒ、ꐧꋦꏦꀧꉻꑫꄻꐛꒆ、ꑳꇤꁨꇐꊇꁧꀊꂥꃅꀻꎆꌠꄹꇙ、ꐳꃅꋬꂻꍏꇩꋈꄻ、ꊻꂷꊇꁧꀊꂥꃅꀻꎆꌠꊥꎆ、ꎍꐽꃅꅉꀨꄉꉻꁧꃤꃅꌠꐽꏡꈴꌠꄹꎆꑠꁁꏯꇬꐮꆽꏣꐨꇫꑟꉆꐨꀉꇨꌠꏱꁈꃄꁈꈨꄐꁆ。ꑓꏮꃄꁕꐮꍣꐨ、ꇓꈓꇓꉈꐮꍣꐨꊨꒊꌠꇬꉜꄉ，ꐳꃅꂿꑘꂿꑘꁡꇤꐛꏀꈴ、ꏟꈯꃅꑣꋂꐊꑷꃅꄖꄑꌄꆣꌠꄹꎆ，ꃄꁕꎆꏣꄐꉻꄻꃪ、ꃄꁕꋮꄮꃅꀻꎆꌠꊥꎆꑠꁁꏯꇬꃶꐚꌠꃄꁈꈨꄐꁆ。ꑓꏮꏓꂱꉌꊈꐥꐨꐯꇯꌣꈚꌠꊥꎆꌠꇬꉜꄉ，ꐧꋦꉪꏦꈯꄜꁌꐨꉜꐨꍔꆙꌋꆀꃄꄻ，ꊋꀉꒉꃅꇤꄉꁱꀕꌤꑘꌄꆣ，ꐳꃅꁱꀕꅐꑘꀻꎆ，ꍏꉸꌧꑳꄜꁊꊋꃤꑌꑲꊋꃤꉀꐕꄷꄜꎼꇁ。
ꃘꏢꌠ，ꀻꎆꌠꌋꆀꋬꂻꏓꇲꃆꂮ。ꋬꂻꌠꆹꀻꎆꌠꇎꏦꉬ，ꀻꎆꌠꆹꋬꂻꌠꏦꀧꅍꉬ。ꋌꊂ5ꈎꇬ，ꉪꇩꏤꋍꑞꋍꑵꊨꀋꄅꄤꎖꊋꌠꃨꆰꐨꐊꊈꆹꄇꇖꀕꃅꁦꎆꇁ，ꀻꎆꌠꌋꆀꋬꂻꏓꇲꂿꃆꀊꅰꃅꊋꋠꇁ。《ꇖꐨ》ꄯꒉꆹꇩꏤꋬꂻꉻꑫꌋꆀꄐꊋꐛꏀꈴꌠꄹꎆꌠꇬꆼꒆꄉ，ꇩꏤꋬꂻꉻꑫꄻꐛꒆ，ꀋꉬꀋꉆꁆꏯꇩꏤꋬꂻꄐꊋꋈꄻꌠꊋꀥꇱ，ꄉꉻꋬꂻꏱꄻꑟꐨꉀꐕ，ꐧꋦꏱꄻꉻꑫꄻꉾꃪꄷꄜꎼꇁ。ꊇꁧꀊꂥꃅꇩꐏꌋꆀꂽꇬꐛꏀꈴꌠꄹꎆꌠꇬꆼꒆꄉ，ꐳꃅꂴꅑꌠꌉꈿꊋꃤꋈꄻ，ꂽꌤꏱꄻꐛꏀꈴꌠꄹꎆ，ꋍꃱꃅꐙꌠꇩꏤꄐꇐꏤꁈꉻꑫꌋꆀꄐꊋꄻꈫꈈꉀꐕꄷꄜꎼꇁ。
ꏃꏢꌠ，ꄈꐊꑷꃅꏲꂠꌠꌭꈬꃆꂮ。ꄈꐊꑷꃅꏲꂠꌠꌭꈬꌠꌋꆀꊋꀥꇱꌠꆹꍏꇩꈁꏦꐛꏀꈴꌠꄹꎆꌠꊇꅉꄉꀧꌠꉬ。《ꇖꐨ》ꄯꒉꆹꑓꏮꄈꎆꏣꐧꋦꀻꎆꏲꂠꄐꊋꌋꆀꑟꐨꉀꐕꌠꇬꉜꄉ，ꊡꀱꇬꄈꍏꑷꏓꋧꋍꃱꃅꏲꂠꌠꌭꈬꌋꆀꊋꀥꇱ，ꄈꍏꑷꀉꒉꀊꂾꌠꏤꁈꄐꁆꌠꃅꇫꑟꉺꏦꄻꉾꃪ；ꐪꊛꄉꄈꏀꀺꌧꇗꌌꉪꇐꏓꋍꃱꃅ、ꉪꐨꏓꋍꃱꃅ、ꃅꐨꏓꋍꃱꃅ；ꎃꊒꃅꊾꌬꍝꄎꐨꌭꈬ，ꇥꀯꍤꎖꈋꍣꉺꏦꄻꉾꃪ；ꋍꑞꋍꁆꏯꅉꂫꊐꌠꄈꎀꍹꋈꄻꌠꏓꇲꄉꄹꎆ；ꌦꀳꏿꄉꍏꑷꏤꐪꉆꐘꉌꊈꃅꑞꅉꑟ；ꄈꌋꆀꇩꏤꍞꊟꉻꑫꄻꉾꃪ；ꏟꈯꃅꍹꈔꌠꏭꁏꉈꈽꌠꈢꇓꀖꃅꃅꌠ、ꀊꉗꃅꃅꌠ、ꉻꄜꃅꃅꌠꃅꋒ。
ꐋꀨꊈ，“ꊯꉬꉬ”ꄐꎖ《ꇖꐨ》ꍤꇖꉌꃹꈴꌠꆹ，ꐊꈴꃀꋌꃢꂿꃆꀋꉬꀋꉆꌠꉬ。ꈀꄸꑌꎔꎗꃅꉪꏡ、ꃹꅼꃅꇕꄟꄉ，ꋈꄻꐨꐥꌠꉜꐨꌋꆀꇖꐨꄜꎼꇁꄉ，ꐯꇯꐊꈴꃀꋌꃢꈿꋒ、《ꇖꐨ》ꄯꒉꄺꀱꋒꌶ。
关于《中共中央关于制定国民经济和社会发展第十五个五年规划的建议》的说明（彝文）
