ꀙꃀꀉꁌꐊꄉꒌꇴꒌꎹꑌꋺ

ꅡꈭꀋꃀꐊꄉꃆꑘꑌꍞꇽꋺ

ꌟꈄꆗꌺꐊꄉꌳꈄꂒꑌꄜꋺ

——ꇬꅇ

ꆺꑳꀗꐆꏢꁮꑌꄉꀘꂾꈼꅇꅲ

ꁦꂓꇈꂓꃅꇗꃅꌋꋌꏮꈴ

ꒌꎃꊐꆠꎁꀠꌠꀋꈁꄷ

ꒌꎹꒌꑣꒌꈎꈜꋋꏢꍬꅷꇁꇬꎷ

ꀃꑍꋋꄮ

ꆺꑳꒌꐥꁨꇉꀕ

ꇤꈏꏢꁮꑌꄉꀉꁌꂘꃅꈁꄽꅲ

ꑗꇗꑖꉬꊿꉗꊿꂘꀺꇐꑳꇐꌧ

ꑭꑽꇇꑽꈌꑽꉐꑽꆹꂵꄷ

ꂘꃅꅇꐚꂄꃅꎔꏿꊫꂫꁤꇅꀕ

ꀃꑍꋋꄮ

ꂘꃅꑗꇖꇀꄮꉬꀐ

ꃀꈌꄹꎐꃆꉉꑘꉉꃷꋪꏦꃤꉉ

ꃆꆳꑘꈠꏦꃤꄡꑟꆪꑟꋌꄜꄉ

ꌕꑟꌕꑵꃆꑘꃣꈌꉉꑽꆹꂵꄷ

ꁍꁈꏦꄻꌺꇖꏦꍬꐥꍂꈝꃀꎴ

ꀃꑍꋋꄮ

ꁍꁈꏦꃤꉏꇙꁟꇰꃲ

ꁦꀑꁧꄩꀋꁧꀊꇫꑌꑿꄄꆈꐛꄮꇬ

ꑳꉎꎆꈜꑌꑿꀖꐪꄄꍅꀕ

ꑌꑿꂾꃚꀉꄉꇐꀳꐊꄉꅲꌒꑵꉙꐛ

ꆫꃅꀋꉬꂿꏿꈠꆺꁦꑌꇮ

ꂿꏿꀋꉬꆫꃅꂮꐚꁦꑌꇮ

ꁍꑗꈯꊂꏮꄉꀉꂿꂘꅇꈁꄽꅱꄮꇬ

ꉙꇁꂘꅇꀺꇁꑳꐨꐛꂨꀕ

ꀉꂿꉙꇁꂘꅇꌻꑘꉌꃀꈐꇬꁨꑭꐛ

ꃅꒉꆈꏸꀕꇁꑠꉖ

ꎹꄑꃬꀮꉙꇁꂘꅇꐊꄉꑭꐨꈝꃀꍬꎂꀕ

ꌟꈄꆗꌺꄩꆹꃅꐎꀿꀏꆹꊖꆈꃀ

ꌟꃅꂓꄜꄛꅉꇀꅉꃄꑌꈁꄽꋺ

ꊖꆈꋋꁕꀂꏽꉠꊿꋅ

ꀃꑍꋋꄮ

ꀋꃀꌺꄿꑶꋦꌣꈚꈏꇨꊋꇨ

ꀙꃀꀉꁌꒌꎹꆠꎷꑗꇖꇁ

ꃅꐎꊖꆈꑇꇐꉏꇙꁠꁧꂵ

ꌄꌺꃀꌺꏱꁈꑖꍝꑖꇠꇁ

ꁍꁈꏦꇗꏦꃤꉏꇙꁠꁧꂵ

ꐩꋊꅺꊈꉂꅇꄛꄮꉬꀐ

ꂘꃅꇐꀳꊋꃤꊐꄮꉬꀐ