ꆀꃅꁡꇤꐛꏀꁏꀐꆺ

  ꑋꅐꑋꈌꁏ，ꑋꈌꉙꏦꀕ，ꈯꌩꈯꇓꃨꈍꀕ，ꈬꉙꈬꃪꍅꇙꀕ，ꀙꏢꑋꈌꇁꌊꆀꃅꁡꇤꑟ，ꆀꃅꁡꇤꋌꁨꈜꀕꎔ。

  ꑋꈌꇁꌊꆀꃅꁡꇤꑟꊂꆏ，ꑳꉎꁧꐙꌿꁧꎴꁧꈚꇈꎺꁧꊪꇖꀵꌠꋍꑍꋍꉙꃅꐛꐈꌐ，ꑳꐮꒉꀕꐻꎵꊪꏮꀕꏡꌠꑌꋍꑍꋍꉙꃅꐈꌌꒉꀕꃴꏵꀕꇈꊷꆣꀕꑠꍈꐛ。ꆀꃅꁡꇤꀻꑳꄄꍅꀕꇈꑳꃴꃅꌗꏧꇂꏥꇁꎑꀊꋩꈧꌠꋍꂷꇈꋍꂷꃅꐈꌌꍋꑳꎆꇌꀕꇈꑱꈐꁤꇅꀕꌠꐛ。ꀉꁌꃄꂿꌩꈪꋫꌠꈍꄮꉬꀋꐛꐈꌌꃄꂿꏡꐕꋍꋬꐛꀐꅊꇈ，ꀊꂵꑳꅝꉖꐎꄓꌠꀘꄲꑳꇤꏡꌠꀊꂵꇱꍞꇈꊂꊐꇫꎭꇈꋍꏅꈩꄸꉺꇬꄉꒉꇁꉏꅉꃅꀛꐂꅷꐺ。ꑳꊂꊫꇬꀊꉘꃮꅸꂷꏦꏡꌠꈍꄮꈍꄮꉬꀋꐛꉜꇉꂾꆏꐈꌌꁱꀙꋍꏢꐛꀐꅊꇈ。ꁧꐙꁡꇤꀊꉘꋍꁥꇈꋍꁥꃅꐮꐊꊗꉆꇂꁮꈩꀊꋨꁥꀃꑍꆏꐯꏑꌌꂘꑳꉼꏓꀕꂶꌠꉜꄉꁧꇬꎷꀐ。ꑳꈫꑳꇋꑘꄃꑭꁭꑟꌠꉷꈜꈝꃀꈍꑋꏡꌠꑌꐈꌌꄇꈜꁤꇅꀕꌠꐛ，ꆺꑳꆸꉻꑔꍀꑒꍀꃅꐙꌠꎺꁯꂷꇭꏡꌠꑌꐈꌌꁤꇅꀕꌠꄆꄒꂷꇭꐛ。

  ꑋꈌꇁꌊꆀꃅꁡꇤꑟꊂꆏ，ꆀꃅꃝꐨꀉꆹꅪꃵꅩꋠꌠꋻꅑꃅꇕꏡꌠꑌꑋꈌꐊꄉꐛꏀꁏꀐ，ꀃꑍꋍꄮꆺꑳꀿꃀꅩꁌꀋꈁꃅꌺꇖꉂꐪꀉꄂꈁꀐ，ꆀꃅꁡꇤꊂꋊꌺꇖꉂꐪꎵꑳꀕꇈꐥꐨꐚꒉꌟꃅꐓꂿꀕꌠꑋꆳꐊꄉꆀꃅꁡꇤꀋꑟꅈꀋꐥ。

  ꀃꑍꋍꄮꆀꃅꁡꇤꄿꏀꑮꆜꋍꑠꇁꌊꉷꃅꇓꈓꄉꄯꒉꀘꌠꀘ，ꌧꇐꂿꇐꇮꇐꑴꇐꌷꌠꌷ，ꎆꎹꋚꈹꑶꋦꌣꈚꋍꑠꀋꃷꎵ。ꆀꃅꁡꇤꋍꏅꃰꊿꇗꍬꏦꍬꄉꃅꀹꈨꑴꃅ，ꏢꈫꏢꎫꉬꅉꂿ，ꑳꈫꑳꇋꉬꅉꂿ，ꈌꑍꂷꐯꀋꍀ，ꃬꑍꂷꐮꀋꄵ，ꋋꑌꄈꅿꇗꅉꉾꇁꃪꐛꅹ，ꐧꋦꎍꐽꀻꎆ，ꃰꊿꀻꁨꌣꈚ。

ꀒ!ꆀꃅꑋꈌꇆ!ꆏꇁꆀꃅꁡꇤꑟꊂꆏ，ꑋꆳꈁꌸꊷꆣꀕ，ꑋꈌꂷꉐꉐꍑꁌꇗꀕꌠꈁꌸꅈꇬꁬꇁꆰꃨꃨꈍꀕꌠꈜꀕꎔꀐꆺ!