ꇰꀋꃀꌠꁍꇩꆹꋧꃅꐩꋊꀻꎆꐨꇬꐊꄉꋍꑍꋍꉙꐞꄿꆹ，ꊿꋅꁱꀕꐩꋊꑌꄚꐊꆹꌊꋋꃀꐪꈜꇬꂿꀋꋻꈨꀋꋻꑠꊭꇬꑟꆹꀐ。ꀉꁌꀋꁧꌧꑳꁧꀦꆹ，ꆀꉙꄎꌬꀕꆀꁱꄄꍅꀕꌠꆈꌠꅇꂷꁱꇐꐩꋊꉬꌠꑓꀠꀕ，ꄷꀋꁨꁱꂷꀉꆹꌧꃀꉉꇬ，ꍏꉷꌧꑳꐥꀹꐩꋊꇬ，ꏧꇵꁱꂷꌋꆀꆈꌠꁱꂷꀉꆹꑍꑵꌠꆹꍏꉷꊿꋅꐩꋊꎵꑳꀕꌠꇬꅐꀿꀃꃅꐛꌠꁱꂷꀉꆹꑍꑵꌠꀒꉬꑟꄷ。

   ꀒꋏꇐꀳꇬ：“ꀀꈪꀂꀋꊐ，ꌞꈪꀂꊎꇁꀋꅲ”ꄷ，ꊨꏦꅇꂷꁱꂷꌊꇩꏤꀻꎆꐨꄛꁱ，ꋧꃅꐛꐈꐨꎥꃪ，ꃅꋊꃅꌋꆹꋊꏀꀺꐨꉪꏡꑲꆀ，ꋧꃅꀻꎆ，ꇩꏤꐛꏀꁏꌠꃹꅼꃅꉪꈴꏡꈴꄎ。ꄷꀋꁨ，ꇩꏤꂘꇐꇩꏹꐛꏀꈴꌠꇬꐊꄉ，ꍏꇩꆈꌠꅇꂷꁱꂷꌊꉋꄅꇩꏤ、ꉋꄅꊿꋅ、ꉋꄅꐧꋦꌋꆀꉋꄅꋌꐛꋌꐙꑠꁱꑴꅐꇁ，ꊿꋅꅇꂷꁱꂷꉋꄅꃆꂮꁱꀋꋻꐩꋊꄺꀱꎼꇁ，ꑠꃅꑲꆀ，ꆈꌠꅇꂷꁱꂷꑌꇩꏤꀉꒉ、ꇩꏤꐞꄿ、ꇩꏤꊫꂫꁨꇉꀕꑠꂷꇬꈯꌬꃅꐊꄉꀻꎆꆹꄎꌠꑓꀠꀕ。

   ꉪꇩꏤꏦꃤꀨꇬꏚꍆꄉꌠꀁꑌꊿꋅꅇꂷꁱꂷꌌꏓꂱꁧꎁꉺꒉꃀꈿꌠꌋꆀꍔꑠꉺꒉꃀꈿꇬꌬꌠꆏꑠꏃꑵꐥ：ꎭꆹ、ꀒꋤ、ꊉꃷꇙ、ꉳꌒꈍ、ꍬꑣ、ꆈꌠ、ꍐꋇ。ꊿꋅꋋꏃꁯꅇꂷꁱꂷꆏꃀꀉꒉꋋꑍꂷꈿꇬꌬꌠꀉꄂꀋꉬꃅ，ꊿꋅꋋꈨꃅꄷꇩꏤꌬꈴꉙꌋꆀꊨꏦꊿꋇꉙꑍꑵꐯꇯꉙꂘꌠ，ꑠꃅꄉ，ꍏꇩꆏꋧꃅꇣꄧꐧꇁꃰꊿꅇꂷꁱꂷꀉꑌꑵꃅꌬꄉ，ꋧꃅꀋꃋꋋꋏꂘꇐꌷꇐꈝꃀꀊꏀꏢꀺꅐꇁꀐꌠ，ꐧꇁꃰꊿꉪꇩꏤꉪꇐꃅꇐꑠꇱꄹꆷꄉꀻꎆꅷꐩꋊꀊꏀꑠꊭꑟꆹꀐꌠ。

   ꊿꋅꅇꂷꁱꂷꆹ，ꇩꏤꌬꈴꌠꅇꂷꁱꂷꋧꃅꏭꀻꎆꐨꇬꐊꄉ，ꇩꏤꂘꇐꋧꃅꏭꍔꐯꐨꇬꐊꄉ，ꍏꇩꊿꍏꇩꅇꂷꁱꂷꌌꄉꋧꃅꃆꂮꁱꑴ、ꄜꉺꄡꑟ。ꇩꏤꋧꃅꂿꃆꏂꇫꌠꀉꄸꀋꉬꃅ，ꍏꇩꏓꂱꑌꍏꇩꅇꂷꁱꂷꌌꄉꐧꇁꃰꊿꂷꋧꃅꂿꃆꑌꊋꇤꅐꇁꄡꑟ。